Shillong, Risaw, 03: Ka Meghalaya SSA Schools Association (MSSASA) kan sa pynlong ïa ka jingïalang paidbah ha madan Malki ha ka 6 tarik mynta u bnai ban ïathir ïatai halor ki jingdawa ba dang sah pongding kaba kynthup ruh ïa ka jingpynskhem ïa ka kam jong ki 14000 ngut ki nonghikai skul SSA ha ka jylla.
Ha u kyrwoh ba la phah ha ka sngi Thohdeing, u President jong ka MSSASA u Bah Aristotle Rymbai u la ong, “ngin sa ïathir sani ïa ki mat kiba ka seng ka la buddien bad ka Sorkar Jylla na ka bynta ban pyntreikam noh.”
U la pyntip ba ka seng ka la buddien thaid shi thaid ha kaba ïadei bad ka jingpynskhem ïa ka kam jong ki nonghikai skul SSA, nalor kaba pyntreikam ïa ka rukom siew tulop thymmai ka ban kyntiew ïa ka tulop jong ki nonghikai skul SSA.
Ka seng kan sa ïakren ruh halor ka hukum ba la pynmih dang shen da ka Iingbishar Supreme Court kaba la bthah ïa ki nonghikai kiba la don lypa ha ka kam ba ki dei ban pyndep ïa ka Teachers’ Eligibility Test (TET).
Kum ban shu pyntip, palat 3,332 tylli ki skul SSA ha Meghalaya ki ladep ban aiti ïa ka No Objection Certificate (NOC) ban aiti ïa ki Management sha ka Sorkar Jylla, na ki 5,131 tylli ki skul SSA kiba don ha ka jylla.
Na kine, 298 tylli ki dei ki skul niam bad ki skul SSA ba la pynïaid da ki riewshimet.
