Shillong, Risaw, 04: U samla Akbarlang Synteng Nongdhar u la jop ïa ka nam kum u Naikhatsaw Synñia bad ka samla Bidalis Sun ka la jop ïa ka nam Lukhimai ha ka rynsan ïakob ba la pynlong da ka Khasi Students Union (KSU) Upper Shillong Circle ha ka sngi Saitjaiñ.
Ha kane ka rynsan ïakob kaba la long ha U Soso Tham Auditorium, Shillong ïa ka kyrdan baar ha ka liang ki shynrang la ïohrah da u samla Luckyson Basaïamoit bad ïa ka kyrdan kaba lai la ïoh rah da u samla Dawanpyndapbor Lyngdoh Mawnai. Katba ha ka liang jong ki kynthei ïa ka nam kaba ar la ïoh rah da ka samla Dorothea Tariang bad ïa ka nam kaba la lai la ïohrah da ka samla Sainara Nongkhlaw.
Nalor kine, ïa ka nam kum ka riam khleh ba itynnat tam la ïoh da u samla Clement Wansanlang Kharshiing bad ka Bidalis Sun bad ha ka jingïakob pyni riam leit lat ba itynnat tam la ïoh da u Cherisfull Dkhar bad ka samla Sharon Grace Sohkhlet.
U MLA jong ka West Shillong Constituency Bah Paul Lyngdoh uba la long kum u kongsan u la sam ïa ki khusnam sha ki nongjop ha kane ka rynsan ïakob ryngkat bad u MLA barim ka Mylliem Constituency u Bah Hamletson Dohling, u President ka KSU Central Body u samla Lambokstarwell Marngar kiba la long kum ki kongsan ba la shah khot sngewbha kyrpang.
Ka KSU ka la pynkup burom ruh ïa ki samla pule kiba pas bha ha ki eksamin bapher bapher naduh ka kyrdan SSLC haduh kiba la pyndep ïa ka Ph.D da ka Maitshaphrang Achiever’s Award bad kynthup ruh ïa ki samla kiba la wanrah nam ïa ka jylla Meghalaya ha ki rynsan ïalehkai sports.
