Shillong, Risaw 05: Ka jingpyntian smai ïa u Justice Soumen Sen kum u Chief Justice ba thymmai jong ka Meghalaya High Court kan long ha ka 8 tarik mynta u bnai ha Raj Bhavan Shillong.
Ka jingthung ïa u Justice Sen kum u Chief Justice jong ka Meghalaya High Court la thung da ka President ka ri India ha ka 26 tarik u Nailur, 2025, hadien ba la mynjur da ka Supreme Court collegium. Un shimti ïa ka kam kum Chief justice naduh ka tarik ba u la shah tian smai.
Kum u nongsaid aiñ uba tbit, ïa u Justice Sen la kha ha ka 27 tarik u Naitung, 1965, ha Kolkata. U la pyndep ïa ka jingleit skul jong u na St. Lawrence High School bad u la pyndep ïa ka eksam LL.B. napoh ka University of Calcutta ha u snem 1990, ha kaba u la ïoh ki marks kiba heh bad u la poi ruh ha ka kyrdan kaba nyngkong ha ka eksam.
U Justice Sen u la long kum u Advocate hapoh ka Bar Council of West Bengal ha u Kyllalyngkot u snem 1991 bad u la pyndep ïa ka law ha Calcutta High Court ha shwa ba un shah kyntiew kyrdan kum u Judge jong kane ka juh ka Ïingbishar ha ka 13 tarik u Ïaïong, 2011.
