Jowai, Risaw, 07: Ki Pulit ka Jowai ha ka step sngi Baar ki la lap ïa ka met jong u khynnah skul uba la 17 snem ka rta uba dang pule ha ka Class-IX na kawei ka iing building kaba don ha Khliehrymphum, Ladthadlaboh, hajan ka khyrdop jong ka Jowai Polytechnic.
Ha ka jingtohkit ki Pulit, ki la suba ba ka jingïap jong une u khynnah skul ka lah ban dei na ka jingdkhat hi jong u ïa la ka jong ka jingim namarba katkum ki dak ki shin ki pynpaw une u khynnah skul u la hap na najrong ka iing saw mala namarba lap ruh ïa ki tiar ki tar jong u na kajuh ka mala.
Shuh shuh ki Pulit ki la ïathuh ba une u khynnah skul u dei uba shong basah ha kawei ka iingshong wai ha Memory Colony, hajan ka Jowai Public School, ha kaba u la mih na la iing ha ka janmiet Lah Sngi U Blei bad u khlem leit phai shuh sha la ing.
U paralok uba ïasah lang bad u, uba dap da ka jingkulmra jingmut namar ka jingbym wan phai iing shuh jong u paralok, u khot ïa ki paralok ban leit wad bad dei ha ka por 3:00 baje mynstep la lap pynban ïa ka met jong u khynnah skul.
Hadien kane ka jingjia ki Pulit ki la pynlong ïa ka jingtohkit da ka jingïarap lang jong ka kynhun Forensic na Shillong bad ïa ka met la phah leh Postmortem bad ka jingtohkit halor kane ka jingjia ka dang ïaid shakmat ban lap ïa ka daw tynrai.
