Shillong, Risaw, 08: U Myntri Rangbah ka jylla u Conrad K Sangma ha ka sngi Balang u la pynbna ïa ka rai jong ka Sorkar Jylla ban buh ïa ki Detox bad ki De-addiction Centre ha baroh ki district bad la bthah ruh ïa ki Pulit ban khynra naphang ïa ki jaka kiba jur bha ka jingkhaïi drok beaiñ, da kaba buh hakhmat ïa ka thong ban pynkylla ïa ka jingim jong ki briew kiba la im kyrni ha u drok bad ban pynlong ïa ka Meghalaya baroh kawei kaba laitluid na u drok.
Ïa kane ka rai la shim ha ka jingïalang pyrkhat kam jong ka Drug Reduction, Elimination & Action Mission (DREAM) ba la ïashim bynta lang da ki ophisar na ki tnat treikam bapher bapher, ki kynhun bad ki seng trei mon sngewbha.
Ha ka jingïakren bad ki lad pathai khubor, u Sangma u la ong ba la bthah ïa ka tnad ka Koit ka Khiah bad ka tnat Social Welfae ban buh ïa ki jaka na ka bynta ki Detox bad ki De-addiction Center ha manla kawei pa kawei ka district.
“Ngi kyrmen ba ha ki lai-saw bnai ngin sa lah ban buh ïa ki Detox bad ïa ki De-addiction Centre kiba treikam pura ha baroh ki district headquarter,’ la ong shuh shuh u Sangma.
U Sangma u la ong ba ïa kine ki Centre lah ban buh ha ki hospital sorkar, ki jaka treikam jong ki riew shimet, lane ki seng treimon sngewbha kiba kwah ban ïatreilang bad ka Sorkar da kaba bynrap ba ka jingïalang ka la ïakren ruh halor ka jingshna ïa ki Standard Operating Procedure (SOP) ban pynïaid ïa kine ki Centre bad ka bynta jong ka jingïashim bynta jong ki paidbah ha ka jingtreikam.
U la ong ba ka Sorkar kan pynthikna ruh ban pyntbit ïa ki nongtrei kiba donkam ban pyntyllun ïa ki kam ha kine ki Centre.
U Myntri Rangbah ka jylla u la pyntip ruh ba la bthah ïa ka tnad Pulit ban pyrkhing bha ïa ki jaka ba jur ka jingdie beaiñ ïa u drok. Ki Pulit kin pynjur ïa ka jingkhynra kyndit manla ka por bad yn buh ïa ki CCTV ha kine ki jaka ban peitngor ïa ka jinglong jingman.
“Kumta la shim ïa ki rai bad manla ka por yn sa pynlong ïa ka jingkhynra kyndit da ki Pulit bad kane kan long ha ka rukom kaba pyrkhing bad kaba tyngeh bha bad la bthah ïa ki Pulit ba kim dei ban ailad khnang ban pynthikna ba kane ka kam kan sdang. Lehse ngim lah ban leit sha baroh ki jaka shi syn leit hynrei ngin sdang na ki jaka ba kongsan ha kaba ngi sngewba hap ban leh eiei da ki Pulit”, u la ong.
U la ong ruh ba ki Pulit ki la lah ban ïohkem ïa ki nongkhaïi hynrei katba kiba pynïaid ïew ïa ki jingdih buaid ha kaba ka ïew ïadie ïathied ka thnem bha bad ki samla jong ngi bad kiwei kiwei ki shah ktah namar ka jingdon jong ki katto katne ki riew shimet kiba die khutia ïa u drok. “Ngi kwah ban pynthikna ba mynta ki Pulit kin treikam bha bad kin hap ban leh da kaba tyngeh bad ïa ki CCTV ruh yn sa pyndait ha kine ki jaka, nalor kaba pynbun shuh shuh ïa ki bor Pulit, ban khynra kyndit da ki Pulit, ka tnat Excise bad kumjuh ruh ki dorbar shnong. Kin sa ïatreilang ban pynthikna ba yn leh ïa kaba donkam ha kine ki jaka baroh,” la bynrap biang u Sangma.
U Myntri Rangbah u la ban jur ba ka Sorkar ka la shimkhia bha ban ïakhun pyrshah ïa ka jingma jong u drok bad kan leh da kaba tyngeh ïa kito kiba donkti ha ka jingdie bad pynïaid ïew ïa u drok.
“Nga kwah ban phah ïa ka khubor sha ki paidbah ba ka Sorkar ka la shimkhia bha halor kane bad phin sa ïohi ïa ki kam kiba tyngeh ha ki sngi ban wan bad kumba nga la ong la ka long na ka tnad Pulit, ka tnad ka Koit ka Khiah, ka tnad Social Welfare ne na ka imlang sahlang, baroh ngin sa ïatreilang ban pynthikna ba ngi lah ban khanglad pyrshah ïa ka jingma kaba ap ïa ka jylla na ka jingwan tuid u drok ha ka jylla jong ngi,” la ong shuh shuh u Sangma.
Haba kylli halor ka jinglong jingman jong ki Rehabilitation Centers kiba don mynta, u Myntri Rangbah ka Jylla u la ong ba kiba bun ki district headquarter ki duna kum kine ki jaka, dei na kata ka daw ba ka Sorkar ka la rai ban buh la kumno kumno kawei ka Detox bad ka De-addiction Centre ha manla ki district. Ka sorkar kan bishar bniah ban pynbeit ïa ka jinglut jingsep bad jingbuh dor jong kine ki jaka ban pynthikna ba kin long kiba lah ban ïoh jingsumar da kito kiba donkam.
U Myntri Rangbah u la pynskhem shuh shuh ba ka Sorkar kan nym sangeh tad haduh ba ka jylla kan da laitluid pura na u drok bad baroh ki nongdih drok kin ïoh biang ïa ka jingkoit jingkhiah.
“Na ka bynta jong ngi, ngin ym sangeh wat haduh ban da sah satang u nongdih drok ba khatduh eh bad ngin da pyllait luid pura ïa ka jylla na u drok,” la pynkut u Myntri Rangbah.
