Shillong, Risaw, 09: Ki bor synshar ka West Jaiñtia Hills ha ka sngi Palei ki la pynjari da ka korphiw miet ha khappud Lapangap ban pyntikna ba kan ym mih shuh kano kano ka jingjïa basngewsih hadien ba la mih ka jingïakynad kaba jur katba ki nongshong shnong ka Lapangap ki dang leit ot kba na ki pynthor ryngkat ka jingsynran lang ki Pulit Meghalaya bad kumjuh ki Pulit ka Assam.
Ha ka hukum ba la pynjari hapoh ka Section 163 BNSS u , u District Magistrate ka West Jaiñtia Hills District Abhinav Kumar Singh u la pyntip ba ka korphiw miet kan treikam naduh ka por 6 baje janmiet haduh ka por 10 baje mynstep ha baroh ki bynta khappud jong ka District hapdeng ka Assam bad Meghalaya.
U District Magistrate u la khang pyrshah ïa kino kino ki briew ban ïaid ha ki bynta khappud kiba dang hap hapoh ka District, la khang ruh ban ïalum paidbah da ki kynhun palat ïa ka 5 ngut, la mana ruh ban rah ïa ki tiar pynmynsaw ha kitei ki bynta khappud.
Kane ka hukum kan treikam mardor naduh mynta ka 9 tarik tad haduh ban da pynbna da kumwei pat.
