Shillong, Risaw 10: Ka Meghalaya State Commission for Protection of Child Rights (MSCPCR) ka la kyntu ïa ki pulit ka jylla ban pynlong ïa ka jingtohkit kaba bniah halor ki jingjia ba sngewsih kiba kynthup ïa ki jingjah rngai bad kumjuh ruh ka jingjia shah pynïap u heprit ba dang 7 snem ka rta napoh ka shnong Nongrah, East Khasi Hills District bad ka jingjia kawei ka khynnah kaba dang 13 snem ka rta napoh ka shnong Khyndewso, Ri Bhoi District bad ka la pynpaw ruh ba ka Commission ka dap da ka jingkhuslai ba kine ki jingjia shah thombor ki khynnah ka la nangkiew ha kylleng ka jylla.
“Ka long kaba kongsan bha ba kito kiba don jingkitkhlieh ba dei ban ithuh bad ba kin shah bishar khlem da pynslem,” ong ka Chairperson ka MSCPCR ka Agatha K Sangma ha ka khubor ba la phah ha ka sngi Thohdieng da kaba pynpaw ruh ka jingsngewlem sha ki longïing kiba mad ïa kane ka jingjia kaba sngewsih bad pynpaw ruh ba kan ïai don ryngkat bad ki ha kane ka por ba ki la duh noh ïa la ki jong kiba ieid ba thoiñ.
Ka la ong ba ka Commission ka la khuslai ïa ka jingïai kiew kine ki jingjia ba jah ki khynnah ha kylleng ka jylla bad ka la shimkhia bha ruh halor kine ki jingjia.
“Haba jubab, ïa ka Model Standard Operating Procedures (SOPs) ban lap ïa kiba jah ne ki khynnah kiba la shah rahbor la dep ban aiti sha ka sorkar na ka bynta ka jingpyntreikam kaba donkam kyrkieh, ban pynthikna ban ïoh ka jingtuklar ha ka por kaba biang ha kum kine ki jingjia,” pyntip ka Sangma.
Ka la pynthikna ba ka Commission ka ïaineh ha la ka jingangnud ban ai ki lad jingïada ïa ki hok bad ka bha ka miat jong baroh ki khynnah ha Meghalaya bad ngin ïaibteng ban ïatreilang marjan bad ki pulit, ki tnat sorkar bad kiwei ki nongshong shnong ban ïada na kum kine ki jingjia hadien habud.
