Shillong, Risaw, 10: Ki nongïalam jong ka Khun Hynniewtrep National Awakening Movement (KHNAM) ha ka sngi Thohdieng ki la dawa ïa ka Khasi Hills Autonomous District Council ba ka dei ban pynshitom mardor ïa ki self styled Rangbah Shnong Garo kiba pynkheiñ ïa ka aiñ da kam rangbah shnong jubor khlem da ïoh ïa ka jingithuh na ka Hima Mylliem.
Ki nongïalam ka seng ki la aiti ruh ïa ka dorkhas ha Chief Executive Member (CEM) ka Khasi Hills Autonomous District Council (KHADC) Bah Winston Tony Lyngdoh ba un shimkhia halor ka jingshah ktah kti jong u Rangbah Shnong ka shnong 15 mer, Ribhoi District.
Kum ban shu pynkynmaw, ki paid Khasi jong ka shnong 15 Mer, Ribhoi District ha ka janmiet sngi Palei ki la tur paidbah sha Byrnihat Police Station hadien ba u Rangbah Shnong ka 15 Mer u la shah thab ha uwei u rangbah Garo ban dawa ïa ki Pulit ba ki dei ban kem mardor bad ban pynshitom katkum ki kyndon jong ka aiñ.
Ha ka jingïakren bad ki lad pathai khubor u Working President ka KHNAM Bah Thomas Passah u la ong ba ka seng ka la kyntu ïa ka District Council ban pynshitom pyrshah ïa ki self styled Rangbah Shnong Garo kiba pyndonkam bakla ïa ka iktiar rangbah shnong da kaba ai ïa ki kot ki sla bad ki shithi sha ki tnat treikam ka Sorkar kaba long kum ka jingpynkhein ïa ka Section 2 (o) jong ka The Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Myliem Syiemship) 2007.
“Ha ka dorkhas ngi la pynpaw ba naduh mynshwa ki don bun bha ki jaidbynriew Garo kiba soi kum u Rangbah Shnong, ki thoh sha ki Block Development Officer, sha u Myntri Rangbah, ki ai ïa ki NoC bad ki syrnot kum u rangbah shnong khlem da ïoh bor na ka Hima Mylliem bad da ka aiñ,” u la ong.
“Ngi ïohi ba ki EC kiba rim kim shym la shimkhia ïa ki jingthoh ba ngi la ai mynshwa dei na kata ka daw ba ki la wanrah kum kine ki jingjia. Lada ka District Council kam pynshitom ïa ki self styled rangbah shnong kan sa wanrah ïa ka jingeh kaba khraw ha ki por ki ban sa wan,” u la bynrap.
U la ong ba ka KHNAM ka la ai jingmut ïa u CEM ka KHADC ba un thoh sha u Deputy Commissioner jong ka Ri-Bhoi bad sha ki BDO ba kim dei ban pdiang ïa ki shithi ba la soi da kiwei ki jaidbynriew lait noh noh ki Khasi kum u Rangbah Shnong.
U la ïathuh ba ka KHNAM ka la ai jingmut ba ha ki shnong ki bym don shuh ki Khasi kiba shong basah ka District Council ka dei ban thung da u Administrator ban pynïaid da u Myntri na ka Hima Mylliem ban soi ïa ki kot ki sla.
U Working President ka KHNAM u la pyni sabut ruh ïa ka lette head ba la thoh Office of the Mawiong Garo Village Dorbar. “Hato kata kam don jingma haba ha u pud u sam ka rilum Khasi kan mih ka shnong Garo. Ngi khmihlynti ba ka KHADC kan leh eiei. Uto u briew (Garo ba thab ïa u Rangbah Shnong 15 Mer) u dei uba ju mlien ban knieh ban shim noh ïa ka iktiar na u pud u sam jong ka jaidbynriew Khasi,’ la ong shuh shuh u Bah Passah.
