Shillong, Risaw, 10: U Symbud Myntri Rangbah ka Jylla Bah Sniawbhalang Dhar uba khmih ïa ka tnat Pynroi Sor ha ka sngi Thohdieng u la pyntip ba ka Sorkar ka la ithuh katto katne ki jaka ba la tyrwa ban pynkynriah ïa ki 342 tyllli ki longiing na Harijan Colony, Them Iew Mawlong.
Haba ïakren bad ki lad pathai khubor, u Bah Dhar u la ong ba ka jingïakren ka dang ïaid shakhmat ban pynbeit ïa ka jaka thymmai.
“Ngi don ha ka kam, bad phin sa tip ynda ngi la shim rai,” u la ong.
Ha kaba ïadei bad ka jingïakren kaba dang ïaid shakhmat bad ka Ministry of Defence, u Bah Dhar u la pynpaw ba ïa kane ka kam ruh dang ïakren. “Ngi dang ïakren bad ki”, u la ong.
Da kaba pynpaw ba kane ka mukotduma ka dang sah ha iingbishar, u Bah Dhar u la ong, “Ha,oid, ka mukotduma ka dang don ha Iingbishar, bad ngi dang leh ïa la ka jong ka kam kum ka Sorkar Jylla (ban pynsted ïa ka jingpynïapynriah jaka).”
U Bah Dhar u la pynpaw ïa ka jingkyrmen ba ïa ka jingeh yn sa ïapynbeit lang, wat hapdeng ka jingbishar ha ka iingbishar.
“Ngi kwah ban ïarai lang da ka jingsngewthuh jingmut, watla kane ka kam ka dang sahkut ha ka Iingbishar. Ngi kyrmen, ban dup lah ban pynbeit ïa ka. Lehse ngin shim por katto katne, hynrei ngim shong kli kti; ngi don ha ka kam bad ngi shimkhia bha ïa kane ka kam,” u la pynthikna.
