Shillong, Risaw, 11: Ki Pulit ka Ribhoi District ki la kem ïa uwei u briew uba la 22 snem ka rta halor ka jingkynnoh ba u dei uba donkti ban leh be-ijot bad ban pynïap ïa iwei i heprit kynthei ha kawei ka shnong ha Ri-Bhoi District.
Ïa une u runar la ithuh kyrteng kum u Iainehskhem Kharsati, uba la shah kem ha ka step sngi Saitjaiñ, kata, tang hapoh 24 kynta ba la kynnoh ba u dei uba donkti ha ka kam bymman, la pyntip u Senior Superintendent of Police ka Ri-Bhoi u Vivekanand Singh Rathore.
I heprit kynthei ba dang 13 snem ka rta i la jah rngai ha ka step sngi Palei hadien ba la wan phai na skul bad ïa ka met jong i la lap da ki nongshong shnong ha kawei ka jaka khlaw ha ka por 7.20 baje mynmiet.
Katkum ka jingïathuh jong ki nongshong shnong, ïa i heprit la lap ba i la thiah hapdeng ka pung snam, bad ka don ka jingmih snam na ka khmut bad ka don ruh ka kot kaba i dang bat sah ha ka kti.
U Iainehskhem u la phla ba u la leh be-ijot shwa ba un pynïap ïa i, la ong u Rathore bad pyntip ruh ba ka jingtohkit halor kane ka jingjia ka dang ïaid shakhmat.
“Ngin sa pynngat kyndon noh tang hapoh 14 sngi hadien ba la pyndep ïa ki jingdonkam katkum ka aiñ. Ngin sa pynthikna ruh ba ka jingtohkit ka dei ban stet khnang ba un shah shah rai pynrem tang hapoh 3-4 bnai eiei,” u la ong.
U Rathore u la ong ba ki Pulit ki la pynngat ïa u runar hapoh ki kyndon aiñ jong ka Protection of Children from Sexual Offences (POCSO) Act bad ha ka National Database on Sexual Offenders (NDSO).
