Shillong, Risaw, 15: Ka Sorkar Meghalaya ka la kyntu ïa ki nongshong shnong jong ka shnong Lapangap ha West Jaiñtia Hills District ba kin kiar na kaba leit ot kba khnang ban ïada na ka jingïakynad kaba lah ban mih ha khappud Meghalaya-Assam.
Kane ka la wan shi sngi hadien ba ka kynhun na Lapangap hapoh ka lama jong ka Joint Action Committee on Border Issue (JACBI) ka la ïakynduh ïa u Myntri Rangbah ka Jylla u Conrad K Sangma, da kaba kyrpad ban ai jingïada khnang ba ki nongrep ka shnong Lapangap kin ïoh lad ban leit ot ïa u kba.
“Watla ka jingot ïa u kba ka long kaba kongsan bha na ka bynta ki nongrep hynrei ka jingshngaiñ bad jingbit jingbiang ka long kaba kongsan tam na ka bynta jong ki. Watla ngi lah ban pynbiang ïa ki bor pahara hynrei kine ki jingjia ki bym lah ban khanglad kim hap hapoh ka jingpeit jong ngi. Ngim kwah ba kano kano ka jingjia kaba sngewsih kan jia shabar nangta, kaba lah ban pynmih ïa ki jingïakynad ha ka thaiñ, ban kiar na kino kino ki jingjia ba sngewsih, ngi la kyntu ïa ki nongshong shnong ba kin kiar (na kaba leit ot kba) ha kum kaneka por, ngi dei ban long kiba ïaishah,” la ong u Sangma ha ki lad pathai khubor ha ka sngi Balang.
U Myntri Rangbah u la ong ba ka jingjia ba sngewsih ka la pynkyndit haduh katta katta ïa ki Pulit ka Meghalaya bad Assam, bad ka la nang kynton shuh shuh ïa ka jingbym shongsuk shongsaiñ ha ka thaiñ.
“Ngim shym la khmihlynti ba ka jinglong jingman kan poi haduh une u pud. Ki la don bun tylli ki jingïakren kiba la ïaid hapdeng ki kynhun bapher bapher bad ngi la khmih lynti ba ngin lah ban ïaid shakhmat hynrei kaba sngewsih ka long ba kane ka jingjia kaba sngewsih ka la jia bad kumba nga la ong kane ka dei kaei kaei kaba wat ki Pulit Assam bad ki Pulit Meghalaya ki la kyndit,” ula ong bad bynrap, “kumta, ngi dang pyrshang ban ïa ka jinglong jingman halor kaei kaba la jia, namarba ka ladep jia, kam long kaba bha ban ai ding.”
U Myntri Rangbah u la pynthikna ba ka Sorkar ka la pyrshang ha ki kyrdan bapher bapher ban wad ïa ki lad ki lynti ban weng ïa kine ki jingeh.
“Hadien ba ngi la ïakren bad ki (JACBI), ki la kyntu ïa ngi ban ïakren bad ki bor synshar (na ka jylla Assam) bad kumba nga la ong ngi dang pyrshang katba lah bad ki ophisar sorkar bapher bapher, ki nongïalam saiñ hima sima ban poi sha kata ka thong,” u la bynrap shuh shuh.
Haba kylli, u Sangma u la ong ba lada ka Sorkar Meghalaya ka ïoh ktien na ka Sorkar Assam kan pyrshang ban ïakren pynbeit namarba kane ka dei ka por ot kba jong ki nongrep bad ban ïapynbeit da ka jingïasngewthuh jingmut.
“Tad haduh ban da la ïapynbeit, watla ka jingot kba ka long kaba kongsan na ka bynta ki nongrep jong ngi, hynrei ngi hap ban sngewthuh pat ba ka jingim bad ka jingshngaiñ ka long kaba kongsan eh na ka bynta jong ngi,” u la ong shuh shuh.
