Shillong, Risaw, 15: Ka Sorkar Jylla ka la bthah ïa ka tnad Pule Puthi ba kan wanrah ïa ka Action Plan na ka bynta ban pyntreikam ïa ki jingai jingmut jong ka Meghalaya State Education Commission (MSEC).
Haba pyntip ïa kane hadien ba la wai jingïalang jong ka Kynhun Myntri ha ka sngi Balang, u Myntri Rangbah ka jylla Conrad K Sangma u la ong ba ïa ka kaiphod jong ka MSEC la wanrah hakhmat ka kynhun myntri ban ïatai sani.
“Ïa ka kaiphod jong ka MSEC la pdiang da ka Kynhun Myntri. (Katkum kane), la bthah ïa ka tnad Pule Puthi ban pule bniah ïa kawei pa kawei ka jingai jingmut bad ban wanrah ïa ki jingthmu kiba lah ban leh bad ka lynti ban ïaid shakhmat,” u la ong ha ka jingïakren bad ki lad pathai khubor.
“(Hadien kane), nangta ka Kynhun Myntri kan sa shim rai kumno ban ïaid shakhmat ha kaba pyntreikam ïa ka kaiphod bad ïa ki jingai jingmut ba la ai da ka Commission,” la bynrap biang u Sangma.
Ïa ka Meghalaya State Education Commission la thaw na ka bynta ban ai jingmut kumno ban pynjanai ïa ka pule ka puthi ha ka jylla kaba ïadei dur bad ka National Education Policy (NEP) 2020.
Ka kaiphod jong ka MSEC, kaba la ai kham mynshwa, ka la ai jingmut halor ki bynta ba kongsan kum ka jingpynskhem ïa ki skul, ka jingpynthymmai ïa ka pule puthi ha ki kyrdan ba kham shalor, ka jingpyntbit ïa ki nonghikai, ka jingtreikam jong ki khynnah skul bad ka jingkylla ha ka rukom treikam ha kylleng ka tnad.
