Shillong, Risaw, 15: Ki dkhot jong ka Manipuri Elders’ Consortium, Shillong (MECS) bad ka Shillong Manipuri Students Union (SMSU) ha ka sngi Balang ki la pynlong ïa ka jingïakhih ban pyrshah ïa ka jingpynpra ïa ka Manipur Rajbari, kaba la tip ruh kum ka Redlands Bungalow.
Ki nongïakhih ki la ïalum ha kane ka jaka ban dawa ba dei ban pynshitom ïa ki ophisar kiba donkti ban ai hukum ban pynpra ïa ka Manipur Rajbari kaba la dap palat 95 snem ha ka 8 tarik mynta u bnai.
Katkum ka jingïathuh jong u Public Relation Officer ka MECS u K. Chirom, ka jingpynpra ïa ka Rajbari Bungalow ha ka kyrteng ban pynbha hapoh ka jingbthah jong ka Planning and Development Authority, Manipur ka long ryngkat bad ka tnad Arts and Culture, Manipur.
U la ong ba (ka jingïakhih ka long ban pyni) ïa ka jingbym pdiang bad ban pynpaw ïa ka jingbitar halor ka jingpynpra ïa kane ka ïing tang hapoh khyndiat por watla ki la don ki jingkyrpad sha ki tnat treikam bapher bapher ka sorkar ha ki bnai baladep ban ym pynpra ïa ka ïing rim hynrei ban shu maramot ïa ki bynta ba la tor bad ban pynneh kumba ka long.
“Ki dkhot jong ka MECS bad ka SMSU ki la dawa ba dei ban pynshitom ïa ki ophisar kiba donkti ha ka jingthmu ban pynpra ïa ka Redlands Bungalow kaba la kynjoh palat 95 snem. Ki la dawa ruh ban sangeh noh ïa ka jingtei shuh shuh ïa ka ïing tad haduh ban da pynshitom ïa kiba donkti,” la ong u Chirom.
“Ka komiti ba la thaw da ka Sorkar ban peitngor bad ban ai jingmut halor ka jingshna thymmai, ïa ka ïing baladep pynpra ka long ka bym lah satia ban pdiang, namarba ki ophisar kiba don bynta ha kane kam bymman kim lah ban long ki dkhot jong ka supervising committee,” u la bynrap.
Ki nongïakhih ki la dawa ba dei ban thaw ïa ka komiti kaba kynthup ïa ki riewshemphang kiba tip kumno ban shna pynbha biang ïa ka ïing, ki dkhot kiba tip bha ïa ki rukom shna ïing bad ka jinglong ka suinbneng ha ka thaiñ.
Ki la kyrpad ruh ban don bynta ha kaba peit ïa ki kam pynthymmai kum ki nongshim bynta.
