Shillong, Risaw 15 : U Myntri Rangbah ka jylla u Conrad K Sangma u la kyntait ïa ka jingkynnoh ba ka don ka jingtih Uranium ha rilum Garo.
U la ong ba kam don kano kano ka sabut kaba kyrshan ïa ki jingkynnoh.
Ha ka jingïakren bad ki lad pathai khubor ha ka sngi Balang, u Sangma ula ong, “kam don eiei kaba kum kata ne kano kano ka jingpynshisha kaba paw.”
Kane ka jingpynshai u Myntri Rangbah ka long halor ka jingkynnoh da u MDC ka BJP na Tura u Bernard N Marak.
U Myntri Rangbah u la kyntu ïa ki nongïalam kiba kynnoh ba kin wan shakhmat ban pyni ruh da ki jingtip kiba bniah bad ki sakhi da kaba kular ba ka sorkar kan shimkhia mardor lada don ki sakhi sabut kiba biang.
“Ki nongïalam kiba don ka jingkitkhlieh kim dei ban shu kren da ka ktien tang namar ba ki kwah ban ïoh pynpaw pyrthei,” u la ong.
“Lada ka long kumta, kan dei ka mat kaba sngewkhia hynrei kiba kynnoh ki dei ban da ai ruh bad ki jingtip kiba bniah kiba lah ban pynshisha khnang ba ka Sorkar Meghalaya kan dei kaba nyngkong eh ban tuklar,” u la bynrap.
Da kaba pynkynmaw biang ïa ka rai jong ka sorkar pyrshah ïa ka jingtih uranium, u Sangma u la ong, “nga la pynpaw shai ïa ka nongrim ba ngi long kiba skhem ba ka jingtih Uranium kam dei ban urlong.”
