Shillong, Risaw, 18: Ka Seng Samla Jaïaw Pyllun ha ka sngi Saitjaiñ ka la pynlong da ka jingthang mombati ha phyllaw jong ka Community Hall Jaïaw Shyiap & Lumpyllon kum ka dak ban sngewlem bad ban pyrshah halor ka jingshah pynïap ba dang shen jong i heprit Insaphira Lyngdoh Mawnai, iba la 4 snem ka rta bad u heprit Kyrshanbor Kharmudai, uba la 7 snem ka rta kiba shong ba sah ha ka shnong Nongrah, Shillong.
Ha kane ka jingthang mombati ba la pynïaid da ka Seng Samla Jaïaw Pyllun la ïashim bynta lang da u MLA ka North Shillong Constituency u Bah Adelbert Nongrum, ki dkhot jong ka Jaïaw Pyllun Dorbar, ka Seng Kynthei Jaïaw Pyllun, ki Sengbhalang bapher bapher ryngkat ruh ki nongïalam jong ka Seng Samla Mawlai Pyllun, ka Seng Samla Shnong Pynthor Pyllun, ka Synjuk Seng ki Samla Shnong, Shillong City, kynthup ruh i kmie jong i heprit Insaphira Lyngdoh Mawnai bad kiba haïing hasem.
Ki nongkren ha kane ka janmiet ki la pynrem jur bad pynpaw ruh ïa ka jingsngew bitar halor ka jingshah dkhat jubor jong ki mynsiem ba luilui jong ki arngut ki heprit.
Ki la kyntu ruh ïa ka Sorkar bad kumjuh ruh ïa ka tnat Pulit ba ka dei ban peit pyrman bha ïa ka jinglong jingman ha ka jylla khnang ban lait na ki jingjia kiba sngewsih bad kumjuh ruh ki la kyntu ïa ki kmie ki kpa ba ki dei ban peit bniah bha ïa la ki jong ki khun ki kti ym ba kin shu ai laitlan katba ki mon khnang ban lait na ki jingjia kiba sngewsih ïa la ki jong ki khun ki kti.
