Shillong, Risaw, 20: Katba ki shnong ki thaw ki dang ïaleh ban pynkhuid ïa ki jakhlia jakhlaid bad ki jaboh jabaiñ kiba satah harud surok bad ha ki kyndong kynshrot jong ki shnong ki thaw hynrei ka long pat kaba isaitmet ba ki don ki riewkhlemakor ki bym suidniew bad ban niewkor ïa ki sawdong sawkun jong ka mariang.
Kane ka la jia ha kawei ka shnong kaba la tip kum ka War Colony kaba don ha shnong Nonglang, South West Khasi Hills District.
Ha ka Lah Sngi u Blei, ki nongïalam shnong jong ka shnong Nonglang ba lamkhmat da u Myntri Shnong u Bah Fastartlin Kharraswai ryngkat ka Excutive Dorbar ki la hap ban pynkhuid ïa ki jakhlia ba ki paitbah ki la bret pathar ha ka jaka la khot kum ka war colony kaba dei ruh ka surok ban mih na Mawkyrwat sha Nonglang.
Na kane ka jaka la ïoh ban sei kumba ar trok ki jakhlia.
U Myntri jong ka shnong Nonglang ha ka jingïakren bad ki lad pathai khubor u la maham tyngeh ïa ki briew kiba ban bret pathar ïa ki jakhlia ha kane ka jaka.
U la kren ruh da kaba shai ïa ki briew kiba bret pathar ïa ki jaboh jabaiñ bad ong ruh ba ki dei hi ki briew kiba sah hajan ka jaka bret niut. “Hynrei namarba ym pat lap markhmat ka shnong kam pat lah ban leh eiei hynrei nangne sha khmat ka shnong kan sa buh da ki briew kiba peit pyrman ïa kane ka jaka khnang ban lap ïa ki briew kiba ju mlien ban bret pathar ïa ki jaboh jabaiñ,” la ong u Bah Fastarlin.
U Bah Fastarlin u la khot bad wer ruh ïa ki paidbah ka shnong Mawkyrwat ba kin ïa treilang ban peit ban khmih ba kum kine ki jingbret pathar bad leh jaboh ïa ka mariang namarba ka jaka ka hap ha khappud jong ka shnong Nonglang bad ka shnong Mawkyrwat.
