Shillong, Risaw, 20: Ka Meghalaya Pradesh Mahila Congress (MPMC) ka la pynpaw ïa ka jingsngewkhia bad jingsngewsih kaba khraw halor ki khubor ba la mih na Lapangap, ha kaba ki nongrep ki la shem jingeh bad ki don hapdeng ka jingïaleh ban ïoh ot ïa u kba ba la dei por ban ot.
“Kane ka wanrah ka jingeh bakhraw ïa ki namar lada kim ïoh ot ha ka por u kba u lah ban duh noh bad kane ka lah ban lam sha ka jingïap thngan ki paidbah ka Lapangap bad kane ka dei ka jingpynduhlad lane ka jingshah khang da ka jingbthah jong u Myntri Rangbah ka jylla Assam, u Himanta Biswa Sarma,” kynnoh ka Mahila Congress ha u kyrwoh ba la phah da ka President ka Kong Joplyn Scott Shylla.
“Ka jingkylli ba ngi kwah ban buh hakhmat ka Sorkar ka jylla Meghalaya ka long, balei ka sorkar Meghalaya ka shong kli kti bad kam ïarap ïa ki nongrep ka jylla Meghalaya? Balei ka Assam mynta ka la lah mo ban synshar ha ki jaka rep jong ka jylla Meghalaya?” la buh jingkylli ka Mahila Congress.
“Kumno u donhok da u Myntri Rangbah ka jylla Assam ban khanglad ïa ka jingot kba ki nongrep ka jylla Meghalaya ba kynthup ruh ïa ki nongrep kiba dei ki longkmie,” la kynthoh shuh shuh ka Mahila Congress.
Ka Meghalaya Pradesh Mahila Congress ka dawa ba ka Sorkar Meghalaya ka dei ban pynshai paidbah kloi kloi halor kane ka jingjia ha Lapangap. “U Myntri Rangbah ka jylla Meghalaya, u Conrad K. Sangma, u dei ban ai ka jubab ïa ki nongrep balei ba ki nong Assam ki lah ban khang ïa ka jingot ïa u kba uba don ha ka jaka jong ka jylla Meghalaya, hato u khaprib ki khmat haba ïadei bad ki nongrep ka jylla Meghalaya?”la kynthoh ka Mahila Congress.
“Ka Sorkar ka dei ban pynthikna ba ki nongrep jong ka Lapangap kin ïoh ban ot noh ïa u kba ba ki lah thung khlem kano kano ka jingshah pynwit ne shah khang ha u Myntri Rangbah ka Assam u Himanta Biswa,” la bynrap u kyrwoh.
Ka Mahila Congress ka pynrem jur ïa kino kino ki bym shah ot ïa u kba ba ladep thung bad ba lah trei shitom da ki nongrep jong ka Lapangap khamtam ki kynthei, kiba dei ki nongrep jong katei ka thain.
Ka Meghalaya Congress ka dawa ïa ka jubab na ka Sorkar Meghalaya mano ba don ka bor ban ai jingbit ïa ki nongrep ka Lapangap ban ot ïa u kba ba ki ladep ban trei shitom ban thung bad ka lah dei ka por ïa ki ban ïoh ban bam ïa u Ka Shillong ne ka Dispur?
