Shillong, Risaw, 22: Ka Federation of Khasi Jaiñtia and Garo People (FKJGP) ka la dawa ïa ki baroh 30 ngut ki dkhot jong ka Jaiñtia Hills Autonomous District Council (JHADC) ba kin resaiñ mardor lada kim lah ban weng ïa ka jingeh ba la mad da ki paidbah ka shnong Lapangap.
U General Secretary jong ka FKJGP West Jaiñtia Hills u Bah Nangkhrawbor Rani u la pynrem ruh ïa ki MDC ka JHADC ki bym shym la leit jngoh ïa ki paidbah ka Lapangap wat hapdeng ka saw ka saiñ.
“Lada kim lah ban leh eiei halor kane ka mat, ka bha ba baroh ki MDC kin hiar shuki noh mardor,” u la ong hadien ka jingleit iuhkjat ha ka shnong Lapangap ban ai ka jingkyrshan sha ki nongrep Khas Pnar kiba la ot ïa u kba ha ka sngi Balang.
U Bah Rani u la pynpaw ruh ïa ka jingsngewkhia halor ka “jingai jem shaba palat” ka Sorkar Meghalaya ïa ka Sorkar Assam.
U la kdew ruh ba ïa ka jingïakynduh ba dang shen bad u Symbud Myntri Rangbah ka jylla u Bah Prestone Tynsong, ha kaba ka seng ka la ai jingmut ban buh ïa ka ktem pulit ba shipor ha Lapangap. U Bah Rani u ngeit ba lada la pyntreikam ïa kane ka jingai jingmut, lah ban kiar na ka jingjia kaba dang shen.
U General Secretary ka FKJGP u la ong ba ka seng ka pynpaw biang ïa ki jingdawa ba ka Sorkar ka dei ban buh mardor ïa ka ktem Pulit ba shipor ha Lapangap ban pynthikna ïa ka jingshngaiñ bad ka jingïada ïa ki nongshong shnong.
Kane ka la jia ha ka por ba la dei ka aiom ot kba kaba dang bteng ha ka shnong Lapangap kaba don ha shilynter ka khappud ka jylla Assam bad Meghalaya kaba don hapdeng ka jingïakajia.
