Shillong, Risaw, 23: Ka Synjuk ki Khlieh Nongsynshar Shnong, Mawsynram C&RD Block ka la ïoh ïa ka jingpynthikna na ka Sorkar ba shen ïa ka Mawsynram C&RD yn sa kyntiew kyrdan sha ka Civil Sub-division.
Kane ka jingpynthikna ka long hadien ba ki nongïalam ka Synjuk ki Khlieh Nongsynshar Shnong, Mawsynram C&RD Block ryngkat ka jingsynran lang u MLA ka Mawsynram Constituency u Bah Olan Sing Suin ki la ïakynduh ïa u Symbud Myntri Rangbah ka Jylla u Bah Prestone Tynsong ha ka sngi Palei.
Ha ka jingïakren bad ki lad pathai khubor, MLA ka Mawsynram Constituency u Bah Olan Sing Suin u la ong, “ha kaba ïadei bad ka jingdawa ban kyntiew kyrdan Civil Sub-division ïa ka Mawsynram u Symbud Myntri Rangbah u la pynpaw ba kane ka kam ka la long kaba biang ba ka Mawsynram ka ladei hok ban ïoh ïa ka Civil Sub-division nalor ki katto katne ki C&RD Block. Kine ki dei kiba la don lypa ha ka thup jong ka Sorkar bad ïa kane ka khubor ngin sa ïoh ha u snem thymmai.”
“Ha kata ka thup kyrteng, ka Mawsynram ka la dei kaba hakhmat eh ban ïoh ïa ka Civil Sub-division. Ïa kata ngin sa tip kham bha ha u snem thymmai,” ula bynrap.
Ha ka dorkhas ba ka synjuk ka la aiti ha u Symbud Myntri Rangbah, ka la pynkynmnaw ba ïa ka Mawsynram C&RD Block la pynkha ha u snem 1962 bad ka dei ruh kawei na ki C&RD Block kaba la rim tam hapoh ka jylla kaba la kynjoh mynta la 62 snem ha une u snem.
Ka Synjuk ka la pyntip ba ka Mawsynram C&RD Block ka dei kaba kynthup ïa ki 144 tylli ki shnong ha kaba ka jingdon jong ki nongshong shnong ka long 65,000 hajar ngut. Ka jingjngai na ki shnong khappud sha nongbah Shillong bad ka jingbym biang ka surok ha ka leit ka wan ki dei ki daw kiba pynsahdien ban pynpoi ïa ki kam pynroi bad namar kata ka shonghok ba ïa ka jingsynshar dei ban pynïajan sha ki paidbah.
Ka jingjngai na Mawsynram C&RD Block sha nongbah Shillong ka long 60 kilomitar bad ka shim por palat 112 kilomitar ban poi sha ki shnong kiba don ha khappud bad ka ri Bangladesh ban poi sha Shillong tang na ka bynta ki kam barit ba ria.
