Shillong, Risaw, 23: Ki nonghikai skul SSA kiba don hapoh ka shatri jong ka Meghalaya SSA School Association (MSSASA) bad ka Meghalaya Fourth Teachers Association (MFTA) ha ka sngi Palei ki la mynjur ïa ka rai ba la pynmih da ka Sorkar ban shimti noh ïa ki skul SSA hapoh ka jylla.
U President ka MSSASA Bah Aristotle C. Rymbai ha ka jingïakren bad ki lad pathai khubor hadien ba la wai ka jingïalang u la ong, hadien ba ngi la pynsngew sha ki nonghikai ïa ki jingkular ba la ai da u Myntri Rangbah ka Jylla u Conrad K. Sangma ha ka jingïalang kaba la long ha ka 16 tarik mynta u bnai ha kaba ïadei bad ki jingpynulong ïa ki ar tylli ki mat jingdawa jong ki nonghikai SSA bad ki nonghikai Fourth Teachers.
Ki ar tylli ki mat, ki long, ban shimti ïa ka skul SSA bad ban pyntreikam ïa ka rukom siew tulop ba thymmai sha ki nonghikai skul SSA.
“Da kawei ka sur ngi la rai ban pdiang sngewbha ïa ka jingkular jong u Myntri Rangbah,” u la ong haba ai khublei ruh ïa u Myntri Rangbah Conrad K. Sangma, ïa u Myntri ka tnat Pule Puthi u Bah Lahkmen Rymbui bad ïa ki ophisar ka tnat Pule Puthi kiba la shimkhia ban weng ïa ki jingeh jong ki nonghikai SSA bad ki nonghikai Fourth Teachers.
Haba kylli, u ong, ‘katkum ka jingkular jong u Myntri Rangbah la ong shai ba ka Sorkar kan sa pynbna hashwa jong ka 25 tarik, Nohprah, 2025 ïa ka rai ba kan shim ha kaba ïadei bad ki ar tylli ki mat jingdawa bad kane kan treikam naduh ka 1 tarik, Ïaiong, 2026.”
“Ki sa don katto katne ki bynta ba ngi dang hap ban ïakren bad u Myntri Rangbah u la kren da kaba shai ba hapoh u bnai Naiwieng bad Nohprah, 2025 ba ka tnat Pule Puthi kan sa pyndep ïa ka jingpynbeit la kumno kumno hapoh u bnai Naiwieng khnang ba ka Sorkar kan dup ïoh ban pynbna ïa ka rai shwa ka Christmas,” u la ong bad bynrap, “ngi dang ap ïa ka jingpyntip jong ka tnat pule puthi.”
