Shillong, Risaw, 23: Ki Pulit ka Ribhoi District ki la pynngat kyndon pyrshah ïa u Ïainehskhem Kharsati, 22 snem ka rta halor ka jingkynnoh ba u donkti ban leh beijot bad pynïap bein ïa iwei i heprit kynthei ba la 13 snem ka rta ha kawei ka jaka khlaw kaba don ha Ri Bhoi district.
U Senior Superintendent of Police ka Ribhoi u VS Rathore u la pyntip ba ïa kane ka case la register ha ka 10 tarik, Risaw, 2025 hadien ba la lap ïa ka met jong i lanot ha ka por janmiet.
Ka tnat Pulit ka la bynshet ha ka Sub Inspector Kong S. Ryngksai kaba trei mynta ha Umïam Police Station ban pynlong ïa ka jingtohkit kaba bniah halor kane ka jingjia.
Kum ban shu pyntip hangne ba i heprit 13 snem i la jah ha ka por kumba 11 baje mynstep ha ka 9 tarik Risaw, 2025 hadien ba la wan phai na skul bad ïa ka met jong i la lap ha ka por kumba 7:20 baje janmiet.
Ka Forensic Crime Scene Unit ka la hiar sha ka jaka ba i heprit i la shah leh beijot bad shah pyntip ban lum ïa ki sakhi satar shwa ban pynkit ïa ka met sha Nongpoh Civil Hospital na ka bynta ban leh ïa ka post-mortem examination.
U Ïainehskhem Kharsati uba la shah kem u la phla ha ki Pulit ba u la leh beijot bad hadien kata u la dkhat jubor ïa ka jingim jong ine i heprit.
