Shillong, Risaw 24: Ka KSU South West Khasi Hills District Unit ka pyntip paidbah ba kumba ju leh man la u snem naduh u snem 2021 ha ka lyngkhuh sngi ïap jong i Mei ieid Spility Langrin, mynta u snem ruh kan pynlong ïa ka jingrakhe ïa ka Sngi pyrshah Uranium (Anti- Uranium Day) ha ka 28 tarik, Risaw (October), 2025 kaba dei ka lyngkhuh sngi ïap ba 5 snem jong i. Ïa kane ka jingrakhe ka seng ka la pynbna paidbah ba yn leh ha shnong Domiasiat, South West Khasi Hills District.
Kum ban shu pynkynmaw, ka KSU ka shim ïa i Mei ieid Spility Lyngdoh Langrin kum iwei na ki nongïalam ha ka jingïakhih pyrshah Uranium naduh ki snem 1990 haduh ka sngi ka jingïap jong i ha ka 28 tarik Risaw 2020. Ine i riewkhraw ym tang ba i la pyni ïa ka jinglong shlur ban pyrshah Uranium hynrei i la ïeng ruh ha ka nongrim baskhem ba i la kyntait ruh ïa ka spah klur mynba ka sorkar India bad ka UCIL ka la tyrwa sha i na ka bynta ban ïoh tih Uranium.
Ka KSU ha kane ka sngi rakhe pyrshah Uranium ka shim ruh ïa ka jingpynskhem jingmut ha ka nongrim ba da leilei yn ym lah ban ailad ïa ka jingpyrshang ban tih Uranium ha ka thaiñ Domiasiat bad Mawthabah. “Ngi la pynskhem ruh ïa ka rai ba ngin ym ailad ïa ki Pre – Uranium mining activity ne kino kino ki kam ba ïadei bad ka kam Uranium la ka long na ka sorkar jylla ne kino kino ki tnad na ka sorkar India,” pynpaw shai ka KSU.
Halor kane ka jingrakhe, ka seng ka khot ka wer ïa baroh ki paradoh parasnam ban ïa mih ryntih ha ka sngi 28 tarik (sngi baar) ban wan sha ka shnong Domiasiat ha kaba kan don shwa ka jingïalang ban rakhe ïa kane ka sngi ha Domiasiat ha ka por 11:30 mynstep ha shwa ban ïa leit buh syntiew lang sha u lum jingtep jong i Mei ieid Spility Lyngdoh Langrin, ong ka kyrwoh na u samla Macdonald Marbaniang, Publicity Secretary, KSU South West Khasi Hills District.
