Shillong, Risaw, 30: Ha ka miet 27 tarik mynta u bnai, ki Pulit ki la ïoh jingtip ba ki runar ki bym lah ban ithuh durkhmat ki la shoh pynmynsaw ïa ki arngut ki briew kiba la tip kyrteng kum u Julash Arengh bad ïa u Hendro M Sangma bad pynjulor ruh ïa ki kali jong ki, kata, kawei ka kali Auto-Rickshaw kaba don ïa u nombar ML-08J-2314 bad kawei ka Sooter (A/F) ha Rongkhon Songgittal, Tura West Garo Hills. Tang shu dep leh ïa kane ka kam ki runar ki la phet bak.
U Mitra Chettri na Beldarpara, Tura West Garo Hills u la ujor sha ki Pulit pyrshah ïa uwei u briew ba la tip kyrteng kum u Baban Saha ba ju khot sin u Sourav, namar ka jingpynbiej ïa u khun jong u, u Darshil Chetry ha kiba bun ki khep bad pyrshang ruh ban lute na u ïa ka pisa T. 25,000.
U Shah Alom Mondol u la ujor sha ki Pulit ba ha ka 27 tarik, Risaw ha ka por kumba 10 baje mynstep ki runar ki bym lah ban ithuh ki la prong tuh hapoh ka iing jong u ha ka shnong Kilboma South Garo Hills bad rong tuh khyndai tylli ki mobile phone.
U Pradip Saha u la ujor sha ki Pulit ban pynti ba ha ka miet 27 tarik, mynta u bnai ki runar ki bym lah ban ithuh durkhmat ki la prong tuh hapoh ka dukan jong u ha iew Zikzak, South West Garo Hills bad rong tuh bun tylli ki marbam bad kynthup ïa kawei ka CCTV monitor, ba shongdor T. 1,08,500.
