Shillong, Risaw, 30: Arngut ki briew ki la mynsaw jur bad la pynkit noh ïa ki sha Civil Hospital ban ïoh jingsumar.
Katkum ka khubor ki Pulit ba la pynmih ha ka website, ki la pyntip ba ha ka 28 tarik, mynta u bnai ha ka por kumba 9.30 mynmiet, khatar ngut ki runar bym lah ban ithuh durkhmat ryngkat bad kawei ka kynthei ki la shoh pynmynsaw ïa kitei ki arngut ba la tip kyrteng kum u Banniew Thabah, 21 snem bad u Korbarlang Marbañiang, 24 snem ka rta ha lum jingtep Lawmali, Shillong bad phet bak tang shu dep leh ïa kane ka kam.
Ha ka 28 tarik mynta u bnai ha ka por kumba 10 baje mynmiet, ki Pulit ki la ïoh jingtip ba uwei u briew uba la tip kyrteng kum u Brightstar Pyngrope, la kynnoh ba u la shoh pynmynsaw ïa u Tipborlang Shadap, 23 snem ka rta ha ka shnong Ksehpyndeng, Mawryngkneng, East Khasi Hills District. Ïa u Bah Tipborlang uba la mynsaw la pynkit noh sha CHC Mawryngkneng bad hadien kane la pynkit noh sha Civil Hospital, Shillong.
U Bah Mecare Suting u la ujor sha ki Pulit ban pyntip ba ha ka 27 tarik mynta u bnai ha ka por kumba 6 baje janmiet, u la lap ba saw ngut ki nongtrei jong u kiba la tip kyrtengkum u Pyndaplangki Siangshai, Leki Shadap, Ritremi Hasem bad u Jafirul Ahmed, ki la die beaiñ ïa ka umphniang diesel ha ki klong na ka jaka buh umphniang kaba don ha Mawkhanu, East Khasi Hills.
Ki Pulit ha ka miet 28 tarik mynta u bnai ha ka por 2 baje noh sngi ki la ïohbat ïa u Willson Bamon, ryngkat bad ki tiar shna kamra sum ïa kiba la kynnoh ba dei kiba shu tuh na 58 GTC Campus, Happy Valley, Shillong. Ki Pulit ki la kem noh ïa une uba la shah kynnoh.
