Shillong, Risaw, 30: U Chief Executive Member (CEM) ka Jaiñtia Hills Autonomous District Council (JHDAC) u Bah Thombor Shiwat u la ong ba ka shnong Lapangap kam dei satia kaba hap hapoh ka “no man’s land” hynrei ka dang dei ka bynta kaba dang hap shapoh u pud u sam jong ka jylla Meghalaya, namarba dei ka District Council kaba ju ai ïa ka Sanad ïa u Waheh Shnong jong kane ka shnong.
“Ha ka jingshisha kam dei ka bynta jong ka ‘no man’s land’ namarba ïa ka shnong Lapangap la ithuh da ka District Council bad ïa ka Sanad jong u Waheh Shnong ruh la ai da ka JHADC. Namarkata, ka Lapangap ka dei ka bynta jong ka jylla Meghalaya. Kam hap (hapoh ka jaka ba ïa kajia pud),” la ong u Bah Shiwat ha ka jingïakren bad ki lad pathai khubor ha ka sngi Palei.
U Bah Shiwat u la pyntip ba ka jingjia ba dang shen ha ka shnong Lapangap, West Jaiñtia Hills District, ka la khie na ka jingïap jong uwei u briew, hynrei ïa ki briew kiba donkti ym pat lah satia ban ithuh haduh mynta.
“Ngim tip uei uta u briew, hynrei ngi la mynjur ban aiti ïa u briew uba donkti hynrei mano ba leh ïa kata ruh ngim lap satia ïa u,” ula ong.
Katkum ka jingong jong u, ka jingot kba da ki nongrep Khasi Pnar ka la jan dep artat.
U CEM ka JHADC u la ïathuh ruh ïa ka jinghuri hura la peit hi da ka Sorkar Jylla, kaba dei ban shim ïa ki lad ki lynti kumno ban khanglad bad ban ïada ïa ki briew kiba sah ha ki jaka ba don ki jingïakynad.
U Bah Shiwat u la kdew ruh ba ka Regional Committee kaba peit ïa ka Block-I kam shym la shong jingïalang shuh naduh ba ladep ka elekshon MLA, bad ha kaba ïadei bad ka jingïakren pynbeit pud ha ka wat kaba ar ruh ka dang sahkut haduh mynta.
Haba kylli, lada ki ar tylli ki Sorkar Jylla ki pynslem ban pynkut noh ïa ki jingïa kajia pud ha ki hynriew tylli ki jaka ba dang sah teng, u Bah Shiwat u la ong ba kata kan dei ka jingeh.
U la ïathuh ba ki jingïakynduh hapdeng ki regional committee ki shah pynwit ha ki elekshon jong ka Assam bad Meghalaya, bad kane ka buh jingeh bha ban pynlong ïa ki jingïakynduh na ka bynta ban ïakren ïa ka mat kaba ïadei bad ka khappud.
“Ngam dei u Chairman jong ka Regional Committee. Lada u Chairman u la lah ban khot noh ïa ka jingïalang, ngin hap ban ïakren ïa kane ka mat. Lada ngi kwah ban pynlong jingïalang na ka liang jong ngi, sha Assam la don ka elekshon, lada ka Assam ka kwah ban pynlong jingïalang, sa sha Meghalaya pat la sdang sa ka elekhson, kine ki dei ki jingeh ïa mynta,” la bynrap u Bah Shiwat.
