Shillong, Risaw, 30: Ka kynhun ki nongpynïaid ïa ki kam jngohkai pyrthei na ka thaiñ Darrang ha ka sngi Palei ki la ïakynduh ïa u Symbud Myntri Rangbah ka Jylla uba khmih ïa ka tnat PWD (Roads) Bah Prestone Tynsong da kaba kyrpad ïa ka Sorkar Jylla ba kan thaw noh mardor da ka fact-finding committee ka ban tohkit bad ka ban shim ïa ki lad ki lynti khnang ban khanglad ïa ka jingjngut ka Wah Umngot ba la kynnoh ba ka dei na ka jingpyntrei ïa ka surokbah Shillong-Dawki.
Ka kynhun ka dei kaba kynthup ïa ki nongmihkhmat na ka Darrang Tourism Promotion and Development Society, ka Shnongpdeng Tourism Development Society, bad ka Dawki Tourism Development Society ba lamkhmat da u Dolloi ka Elaka Darrang u Bah Pyrwa Lymba.
Ka kynhun ka la aiti ruh ïa ka dorkhas kaba pynpaw ïa ki jingshah ktah bad ka jingshah pynjaboh ka wah Umngot kaba la ktah pat ïa ki trai shnong kiba ju im kamai jakpoh na ki kam jngohkai pyrthei.
Ka jingjngut jong ka wah ka la ktah ruh wat ïa ka nam ka burom jong ka jylla Meghalaya namarba ka wah Umngot ka dei kaba la ïoh ïa ka nam kum ka wah kaba sngur tam ha ka jylla bad kaba khring bha ïa ki nongjngohkai pyrthei.
Ki la kyntu ïa ka Sorkar ba kan pynlong da ka jingtohkit kaba bniah ïa ka tyllong kaba long ka daw kaba wanrah ïa ka jingjaboh jong ka wah bad ban shim pat ïa ki lad ki lynti kumno ban pynlong biang ïa ka wah Umngot kaba khuid kumba ju long ha ki por ba la leit noh.
“Watla ngi don katto katne ki dak shaphang ki tyllong kiba pynmih ïa kane ka jingjaboh, ngi shaniah ha ka jingstad kumba la kular da ka Sorkar ban pynlong ïa ka jingtohkit kaba bniah bad ban shim ïa ki lad ki lynti ban pynbeit kyrkieh. Ngi kyrpad jur ba ka ophis jong phi kan tuklar kloi, la ka long da kaba thaw ïa ka komiti wad bniah ïa ki jingshisha ban khanglad ïa ka jingjaboh lane da kaba wad ïa ki lad ki lynti ban pynkhuid biang ïa ka wah khnang ban ïada na ka jingshah pynjaboh,” ki la ong bad bynrap, “ka jingtuklar kloi jong phi halor kane ka kam kan ïarap shibun ban ïada ïa ka jingim jong ki nongshong shnong bad ban pynneh pynsah ïa ka jingsngur jong ka wah Umngot ha ka liang ka mariang bad ha ki kam jngohkai pyrthei.”
Nalor kata, kane ka kynhun ka la kyrpad ba dei ban pynbeit thymmai ïa ka por khang surok manla ka sngi ha ka thaiñ Laitlyngkot.
Ïa mynta, ka por khang ïa ka surok naduh ka por 11:00 baje mynstep haduh ka por 4:00 baje janmiet, ka la ktah ïa ki nongjngohkai pyrthei ha ka por lyiur. Ka kynhun ka la kyrpad ban pynkylla ïa ka por sha ka 12:00 baje mynsngi haduh ka por 4:00 baje janmiet khnang ban pynsuk ïa ka jingwan ki nongjngohkai bad ban pynneh ïa ki kam jngohkai pyrthei ha ka thaiñ.
Ha u kyrwoh, ka kynhun ka la pynpaw ba ka jingngut jong ka wah Umngot ka dei na ka daw ka jingshna surok khamtam ka surok Shillong-Dawki kaba la wanrah ïa ka jingjaboh ha ka rud wah.
Ka la ong ba u Symbud Myntri Rangbah u la pynthikna ïa ka kynhun ba un sa peit bniah ïa kane ka kam bad un pyrshang ban wad ïa ki lad ki lynti ban weng ïa ki jingeh.
U la pynpaw ruh ïa ka jingkmen ban ïohi ïa ka jingshitrhem jong ki kynhun ha ki kam jngohkai pyrthei bad u la pynthikna ïa ki ba un kyrshan ban kyntiew ïa ka kam jngohkai pyrthei ha ka thaiñ.
Ha ka jingïalang la ïa don lang u MLA barim ka Amlarem Constituency u Bah Stephanson Mukhim.
