Shillong, Naiwieng 03 : Arngut ki bar jylla ïa kiba la suba ba ki dei ki snar khaii drok ki la shah kem ha ki Pulit ka Anti Narcotic Task Force (ANTF) ha ka Lah Sngi u Blei. Kine ki arngut kiba la shah kem ki dei kiba la tip kum u Noor Amin bad u Aftav Uddin na Silchar, Assam.
Ka jingïohkem jong ki Pulit ïa kine ki arngut ki suba nongkhaii drok ha Madariting, Shillong ka long hadien ba ki Pulit ki la ïoh jingtip na ki tnat syntiat ha kaba ïadei bad ka jingdon jong kawei ka kali kaba la suba ba ka kit ïa u drok.
Ha ka jingpynap shrip, ki Pulit ki la ïoh bat ïa kawei ka kali Maruti Alto kaba don ïa u nombar ML11-2937 bad ha ka jingkhynra ki Pulit ki la ïoh kurup saw synduk u drok Heroine, uba don ka jingkhia haduh 41.53 gram.
Hadien ba ladep pynlong ïa ka jingtalasi ki Pulit ki la ïalam noh ïa u Noor Amin bad ïa u Aftav Uddin sha thanat.
Ki Pulit ki la pynlong ïa ka jingtohkit kaba bniah pyrshah ïa kine ki arngut ban lap ksai ïa ki briew kiba donkti ha ka jingkhaii ïa u drok.
