Shillong, Naiwieng, 04: Ka seng kieng atiar ba la shah kheiñ be-aiñ Hynniewtrep National Liberation Council (HNLC) ka la pynpaw ïa ka jingsngewlem ïa ki bahaiing hasem ïa ki paidbah ka Hima sohra halor ka jingkhladnoh jong u Paiem Freeman Sing Syiem.
Ha u kyrwoh ba la phah sha ki lad pathai khubor ha ka sngi Baar, ka seng ka la pynpaw ba u Pa’iem u la long kum ka nongmuna ba imjong ka burom bad ka jinglah ban ïaleh pyrshah jong ka Hima, bad ka khot bad wer bankynmaw burom ïa u lyngba ka jingïatylli, ka hok, bad ka jingaiti ban ïada ïa ka hok bad ka pateng jong ka jaitbynriew Hynniewtrep.
Ka HNLC ka la ai khublei ruh ïa u Pa’iem Maremdor Syiem u ban sa shimti ïa ka khet kum u Syiem ba thymmai jong ka Hima Sohra, da kaba kyntu ïa u ban ïalam da ka jingshlur, ka jingstad bad ka jingïohi jngai.
Ka seng ka la banjur ïa ka jingdonkam ba u Syiem ba thymmai un ïada ïa la ki jong ki briew, ban pynthikna ïa ka jingshngaiñ bad ka burom jong ki bad ban ïakhun ïa ka jingpynneh ïa ka tynrai bad ka lariti.
Ka HNLC ka pynpaw ïa ka jingkhlaiñ bad jinglah ban ïaleh pyrshah jong ka Hima ha ka histori, da kaba ai nuksa ïa ki nongïalam kiba khrawbor kum u Syiem Tirot Sing, u Syiem Duwan Sing bad u Syiem Borsing Syiem, kiba la hukum ïa ki shipai ban pynskhem ïa la ka jong ka khyndew ka shyiap bad ban ïada ïa ki briew lajong.
Ka seng ka la pynpaw ruh ïa ka jingsngewsih halor ka jingbym don ka jingtbit bad jingkut jingmut jong ki nongïalam ba mynta bad ka khot bad wer ban pynbeit thymmai ïa ki jaka pahara ban pynpaw ïa ka kynhun kaba khlaiñ jong ki kpa tymmen, katba dang pynthikna ïa ka jingpynkylla thymmai, ka jingpynbeit ryntih, bad ka jingbud ryntih ïa ki aiñ bad ki hok longbriew manbriew.
