Shillong, Shillong, 05: Khyndai ngut ki dkhot ka Meghalaya Commercial Truck Owner and Driver’s Association (MCTO&DA) ryngkat bad arngut ki nongïalam ki la shah kem ha ki Pulit ka Mawryngkneng Police Station, East Khasi Hills District hadien ka jingkawut lathi ïa ki nongñiah trok katba ki dang bat ïa ki trok kiba ïaid lyngba ka surok Shillong-Jowai, katba ki dang pynlong ïa ka jingïakhih ha ka shnong Mawryngkneng kum ka jingpynlong ïa ka jingïakhih kaba khlem pud sngi.
Ki arngut ki nongïalam kiba la shah kem ha ki Pulit ki long u Preident ka MCTO&DA Central Body Bah Mosklander Marngar bad u President ka MCTO&DA, Jaiñtia Hills Unit u Bah Heibor Pariat.
Tang ha ka janmiet sngi Balang ki Pulit ki la rah ban tian bishar ïa kine ki arngut ha Kashari District and Session Court ka East Khasi Hills District.
Ha kane ka jingjia kaba la jia ha ka por kumba 12:30 baje shiteng synnia jong ka Sngi Balang, bun ngut ki dkhot jong ka (MCTO&DA) ki la mynsaw hadien ba ki la shah kawut lathi bad na ka jingsiat tear gas bad siat stunt grade da ki Pulit.
Katkum ka thymmei khubor ba la ïohlum la ïathuh ba ka jingkawut lathi jong ki Pulit ïa ki nongñiah trok ka long hadien ba ki la bat ïa kawei ka trok kaba dang thmu ban ïaid wat hapdeng ka jingïakhih jong ka seng.
Kum ban shu pynkynmaw, ka MCTO&DA ka la sdang ïa ka jingïakhih ba khlem pud sngi ban sangeh kit ïa ki mar naduh ka 27 tarik u bnai ba ladep da kaba dawa ïa ki bor pynïaid karkhana kiba don ha East Jaiñtia Hills District ban siew ïa ka bai kit mar kaba ïahap bad ka dor kaba la pynbeit da ka Sorkar Jylla bad ban kyntiew ruh ïa ka dor kit mar wat shabar ka jylla.
Baroh shitaiew, ki dkhot ka MCTODA ki pynlong ïa ka jingïakhih ha surok Jowai Bypass ha Soomer Mihmyntdu-Khliehtyrchi, West Jaiñtia Hills District hynrei ha ka 4 tarik u bnai baladep ki la kynriah noh sha Mawryngkneng, East Khasi Hills District ban bteng ïa ka jingïakhih jong ki.
