Shillong, Naiwieng, 12: U Myntri ka tnad Pule Puthi ka Sorkar Jylla Bah Lahkmen Rymbui ha ka sngi Balang u la ong ba ka jingthmu “ba nyngkong eh” jong ka Sorkar ka long ban pynbeit ryntih ïa ki skul ha kylleng ka jylla Meghalaya.
Haba kren sha ki lad pathai khubor, u Bah Rymbui u la batai ïa ki jingthmu bad u la ong, “ka thong jong ngi ka long ban pynbeit ryntih ïa ki skul, ban pynthikna ba kin don ïa ki nonghikai katkum ka jingdonkam, ki khynnah skul kiba biang, bad ki jingtei kiba biang.”
U la bynrap, “nga kyrmen ba ngin poi sha ka kyrdan ba baroh ki skul ha Meghalaya ki don ïa ki nonghikai katkum ka jingdonkam, kaba plie ïa ki lad kiba pynkylla dur.”
Haba pynpaw ïa ki jingeh halor ki nongtrei hapoh ka Sarva Shiksha Abhiyan (SSA), u Myntri ka tnad Pule Puthi u la pynthikna ba ka Sorkar Jylla kan pynneh ïa kane ka skhim wat lada ka Sorkar Pdeng ka pynsangeh noh ïa ka, da kaba kdew, “yn sa peit bniah na baroh ki bynta… ka Sorkar Meghalaya kan sa peit ba kane ka skhim kan ïai bteng.”
Haba kylli shaphang ka jingai pisa, u Bah Rymbui u la ong ba ym pat lah ban tip ïa ka jingkhein kaba thikna.
“Ngim pat poi sha kaba kut ba katno ka pisa ka donkam. Ngi dang trei ïa kata kata bynta bad ngi kyrmen ban ïoh jingkhein ha kine ki khyndiat sngi ban wan. Nangta ngin sa bishar bniah ïa ka jinglut jingsep na manla ka jingpynkiew tulop kaba donkam.”
U la pynpaw ruh ïa ki jingeh ha ka liang ka pisa tyngka, da kaba ong, “ka jingbun ki nonghikai ka long kaba heh bha… ngin sa shong bad ka tnad Pla Tyngka ban pyrkhat haduh katno ka Sorkar ka lah ban bei, da kaba buh ha ka jingmut ïa kiwei pat ki jingkitkhlieh kum ki dawai ha ki hospital bad ki jingshna ïa ki surok.”
U Bah Rymbui u la bynrap ruh da kaba ong, “ngin sa pyrshang ban leh hok na ka bynta ki paidbah baroh.”
