Shillong, Naiwieng, 12: U nongïalam ka Congress u Bah Vincent H. Pala u la pyntip ba ki don 67 ngut kiba pan tiket na ka Congress na ka bynta ban ïakhun na ki 29 tylli ki Constituency ha ka elekshon ka ban sa long ha Garo Hills Autonomous District Council (GHADC).
“Dang shen nga la leit sha rilum Garo bad nga la ong ïa ki nongtrei ka party ba ka Meghalaya baroh kawei ka peit ïa ngi, lada ka Congress ka ïa knieh tiket para ma ki (kam long kaba bha hynrei) lada ki ïatrei lang na ka bynta ka bha ka miat jong ka thain, ka don ka jingkyrmen ïa ka party”, la ong u Bah Pala.
U la bynrap ba bun na ki nongtrei ki la kular ban ïatylli na ka bynta ka elekshon.
U Bah Pala u la kdew ïa ka jingwanphai ba dang shen jong ki katto katne ngut ki nongïalam ba pawkhmat, ba kynthup ïa u Zenith Sangma uba long u President barim jong ka Youth Congress bad Secretary jong ka AICC, ha ryngkat u John Leslee bad u Winnerson D. Sangma.
U la kdew ba kumba 85 % na ki dkhot ka Trinamool Congress ki la rung sha ka seng Congress, kaba pynskhem ïa ka nongrim jong ka seng.
U Pala u la kynthoh ba ka jingwan phai biang jong u Zenith ka la pynmih ïa ka “jingktah ha kylleng ka jylla.”
“Ka jingwanphai biang jong u Zenith Sangma bad kiwei kiwei ki nongïalam—u John Leslee bad u Winnerson D Sangma—kan ai bor shisha ïa ka party ha kane ka thaiñ. Kumba 85 percent na ki dkhot ka TMC ki la phai dien biang sha ka Congress. Ngi la rai ban wanrah biang ïa u namarba ka Garo Hills mynta ka duna MLA bad MDC, tang uwei u MP u bunkam bha sha New Delhi. Nga la leit hi sha u Zenith bad nga la kyntu ïa u ban buh sharud ïa ki jingïapher na ka bynta ka jingbha jong ki paidbah. U la kam ba ka jingbamsap ka la long kaba palat pud, ka jingsngew kaba la pynpaw da kiba bun kiwei pat, kynthup ïa ki nongkyrshan na ka thaiñ rilum Khasi bad ka rilum Jaiñtia kiba la rung mynta sha ka seng. Ka jingwan rung biang jong ka Zenith ka ladep pynmih ïa ka jingktah kaba bha ha kylleng ka jylla,” u la ong.
U la ïathuh ruh ba kane ka sienjam kan ktah bha ïa ka NPP.
