Shillong, Naiwieng, 14: Ka Ïingbishar Meghalaya High Court ka la phah da ka notis sha u Lamphang jong ka Ïingdorbar Thawaiñ ka Jylla u Thomas A. Sangma hadien ba la don ka jingujor pyrshah ïa ka rai jong u halor ka jingdawa jong ka seng Congress ban mait kyrteng ïa ki MLA phet seng.
Ïa ka jingujor la mudui da u Secretary jong ka Meghalaya Pradesh Congress Committee (MPCC) u Bah Manuel Badwar.
U Bah Badwar u la tynjuh ïa ka hukum ba dang shen ba la mynjur da u Lamphang jong ka Ïingdorbar Thawaiñ kaba la pynkut noh ïa ka dorkhas jong u kaba dawa ban mait kyrteng ïa ki saw ngut ki MLA ka Congress kiba la phet sha ka National People’s Party (NPP) kaba bat ïa u lakam synshar.
Ha ka jingbishar, u Advocate General A. Kumar, ba la ïarap da u Advocate ka Sorkar u S.Laloo, u la pdiang ïa ka notis ha ka kyrteng jong u Lamphang (nongshah mudui No-1).
Ha ka hukum ba la pynmih ha ka sngi Thohdieng, ka Bench ba la khlieh da u Justice HS Thangkhiew ka la bthah ban phah ïa ka notis sha ki nongshah mudui hapoh lai sngi.
U Advocate General u la pynpaw ïa ki jingpyrshah ba nyngkong eh ha kaba ïadei bad ka jingkynthup lang ka writ petition pyrshah ïa ki saw tylli ki hukum ba ladep ujor.
Kum ka jubab, u nongïasaid aiñ jong u nongmudui u K.V Kharlyngdoh u la kyrpad bad la ai jingbit ban ïoh jingbthah, ha kaba la pynkynriah noh ïa ka kam sha ka 8 tarik, Nohprah, 2025.
Ha ka 7 tarik, Naiwieng, u President jong ka seng, u Bah Vincent H. Pala, ula ong ba dang shen, u Lamphang, ula kyntait noh ïa katei ka dorkhas, halor ki nongrim ba ka don jingbakla, da kaba ong ba la soi da u dkhot jong ka seng, ym da u nongthaw aiñ.
“U Lamphang u la kyntait noh ïa ka dorkhas da kaba kdew ba tang u nongthaw aiñ uba lah ban soi ïa ka dorkhas”, la ong u Bah Pala haba u la kynnoh ba ka rai jong ka Ïingbishar Supreme Court ka kyrshan ïa ka nongrim jong ka seng, kaba ailad ïa u dkhot jong ka seng ban soi ïa kum kane ka ujor.
“Ngi don ïa ka lad kaba biang bad ngin tuklar ïa ka rai jong u Lamphang,” la ong u Bah Pala bad bynrap ba u nongïasaid aiñ jong ka seng u dang pynkhreh ïa ka jingujor ban mudui ha Meghalaya High Court hapoh kane ka taiew.
Ka Congress ka kut jingmut ban buddien ïa ka jingmait kyrteng ïa ki saw ngut ki MLA phet seng, la ong u Bah Pala da kaba pynpaw ïa ka jingsngewsih ïa ka rai jong u Lamphang.
Ha ka 28 tarik, Nailar, u Secretary jong ka Meghalaya Pradesh Congress Committee (MPC) u Bah Manuel Badwar u la aiti ïa ka dorkhas kaba thymmai sha u Lamphang ka Ïing dorbar da kaba pynshong nongrim ba ka jingphet seng jong ki MLA kam ïahap satia ïa ka kyndon kaba donkam.
Ïa ka jingujor la mudui katkum ka Rule 6 jong ka Meghalaya Legislative Assembly (Disqualification on Ground of Defection) Rules, 1988, pule lang bad ka para 2(1)(a) of the Tenth Schedule to the Constitution of India, 1950.
Ïa kane ka rai la shim hadien ba u MLA ka Mylliem u Bah Ronnie V. Lyngdoh u la mih noh na ka seng Congress bad weng noh ïa ka jingujor ba la mudui hakhmat ka Ïingbishar Meghalaya High Court pyrshah ïa ki lai ngut ki MLA, kata u Dr Celestine Lyngdoh (Umsning), u Bah Charles Marngar (Mawhati) bad u Bah Gabriel Wahlang (Nongstoin).
U Bah Ronnie V. Lyngdoh ula pynïasoh sha ka NPP ha ka 30 tarik, Naitung, katba lai ngut ki MLA ki la pynïasoh ha ka 19 tarik, Nailar, 2024.
U Lamphang u la ai ka jingithuh ïa ka jingpynïasoh jong ki saw ngut ki MLA sha ka NPP.
Ka Congress, kaba la jop san Seat ha ka elekshon 2023, kam don MLA shuh ha ka Ingdorbar Thawaiñ kaba don 60 ngut ki dkhot.
Na ki san ngut, u Saleng A Sangma, u la resaiñ noh kum u MLA ka Gambegre hadien ba u la shah jied kum u MP ka Tura.
