Shillong, Naiwieng, 14: Ka Kynhun Myntri jong ka Sorkar Jylla ha ka sngi Thohdieng ka la mynjur ban shim jaka sa 35 akar ha ka shnong Tynring, New Shillong Township na ka bynta ban pynïasoh ïa ka Administrative City bad ka Knowledge City.
Ha kane ka jaka yn sa shna ruh ïa ka Central Jail ba thymmai, ban sa pynkynriah noh ïa ka District Jail kaba don mynta ha Shillong.
Ha ka jingïakren bad ki lad pathai khubor hadien ba la wai ka jingïalang, u Myntri ka Sorkar Jylla Bah Wailadmiki Shylla u la pynshai ba katkum ka jingïakren ka dor jong ka jaka ka long hapdeng T. 250 shi sqft bad T. 2,691 na ka bynta shi square meter kaba long hapoh ka jingpynbna da ka Deputy Commissioner kaba T. 2,900 na ka bynta square meter.
U la bynra ba ka jingthied ïa ka jaka ka la ïaid shakhmat, bad ka jingshna ïa ka Phatok yn sa sdang noh shen tang shu ïoh ïa ka jaka.
Kane ka jingthmu ka long kum shi bynta ka jingtei ïa ka New Shillong Township, ban pyntyllun ïa kiba bun ki projek, kythup ïa ka jingshna ïa ka Administrative bad Kknowledge City, khnang ban weng ïa ka jingkhapngiah jong ka sor Shillong kaba la nang kharoi ha ka jingbun briew katba nang mih ki snem.
Ha kane ka jingïalang, ka Kynhun Myntri ka la mynjur ban pynbeit thymmai ïa ka Meghalaya Fiscal Responsibility and Budget Management (FRBM) Act, 2006.
Ka jingpynbeit thymmai ka long katkum ka Fiscal Framework jong ka jylla bad ka rai jong ka Sorkar Pdeng kaba ai jingbit ïa ki jylla ban kyntiew ïa ka Fiscal Deficit Ceiling na ka 3 % sha ka 3.5 % jong ka Gross State Domestic Product (GSDP) na ka bynta ban shim pisa kylliang.
U Bah Shylla u la ong, “kumba phi tip ka Sorkar India ka ju shah ïa ngi ban pynkiew ïa ka Fiscal Deficit na ka 3 % sha ka 3.5 % ban shim ram. Kumba ngi la leh ha u snem baladep bad ngin hap ban leh ruh kumta manla u snem.”
