Shillong, Naiwieng, 18: Ki bor pynïaid jong ka skulbah North-Eastern Hill University (NEHU) ki la mudui da ka ejahar bad pan ruh ïa ka kaiphod kaba bniah halor ka jingñiah kali khlemakor kaba la lam sha ka jingmynsaw jur jong ki ar ngut ki samla pule ka Department of Chemistry ha phyllaw ka skulbah.
“Ka University ka pynrem jur ïa ka jingñiah kali khlem akor kaba la wanrah ïa kane ka jingjia ba sngewsih. La ujor ejahar, bad la bthah ïa ka tnat ba dei peit jong ka University ban pynkhreh bad aiti ïa ka kaiphod kaba bniah katba lah,” ong u kyrwoh ba la pynmih ha ka sngi Baar.
Ar ngut ki samla pule kynthei ki dang don mynta hapdeng ka jingshah sumar ha Intensive Care Unit (ICU) ha Nazareth Hospital.
Ka University ka la pynpaw ïa ka jingkyrshan bad jingsngewlem ïa ki samla pule kiba la mynsaw bad ki bahaïing hasem jong ki bad la ïohlad ruh ban ïa kren ïa ki.
Ka University ka la kyrpad ïa ki lad pathai khubor bad ki paidbah ba kin pyndam bad ban weng noh ïa kino kino ki video ne ki dur jong kane ka jingjia aksiden kiba la saphriang ha ka social media, da kaba kdew ïa ka jingsngewsih kaba jur bad ka jingshah ktah ha ka jingmut jingpyrkhat jong ki bahaïing hasem bad ki samla pule.
“Ngi kyntu ïa baroh ban leh da ka jingsngewthuh, ka jingsngewrit bad ka jingburom da kaba kiar ban pynphriang bad ban weng ïa kino kino ki jingjia kiba kum kine,” la bynrap biang u kyrwoh.
Ka University ka la pynthikna ïa ka jingïatreilang bad ki bor jong ka aiñ bad ki bor pynïaid jong ka hospital.
