Shillong, Naiwieng, 19: Ka Khun Hynñiewtrep National Awakening Movement (KHNAM) ka la kynnoh ba ka tnat Secretariat Administrative Department, Nazarat ka la pyrshang ban buhrieh ïa ka jubab RTI ba la pan da ka seng halor ka jingdon jong ki nongtrei byllai sngi ba la siew tulop hi da ka Sorkar.
Ha ka jingïakren bad ki lad pathai khubor ha ka sngi Balang u Working President ka KHNAM Bah Thomas Passah u la ong ba ha ka jubab ba la ai da ka SAD, Nazarat ka la shu kdew ba ki don 139 ngut ki nongtrei bylla sngi (daily wages worker) hynrei khlem da ai satia ïa ki kyrteng jong ki nongtrei.
U la ai nuksa ruh da kaba kdew ïa ka jubab RTI kaba pyni ba tang ha u bnai Ïaiong, 2023 ka tnat ka la siew tulop sha ki 139 ngut ki nongtrei bylla sngi haduh T. 15, 37, 340 lak bad kdew ruh ter ter haduh u bnai Nailur, 2025 ba ka jingsiew tulop ka la kot T. 19, 63, 830 lak.
U Bah Passah u la kynnoh ba ka tnat SAD, Nazarat ka dei tang ka Department ban thungkam jong ki ophisar, ki heh ki haiñ bad ki high level kiba shong ha Secretariat.
U la ong ba ka seng kan sa thoh sha ka First Appellate Authority katkum ka Section 19 sub para (1) jong ka RTI Act 2005 bad sha u Chief Information Commissioner (CIC) da kaba kam ba ka jubab RTI kam pat long kaba pura.
