Shillong, Naiwieng, 19: U MLA barim jong ka South Tura u John Leslee K Sangma ha ka sngi Balang u la pynïasoh biang ïalade sha ka Congress hashwa ka elekshon sha ka Garo Hills Autonomous District Council (GHADC), kaba la buh ban pynlong ha u snem ban wan.
U President ka Congress u Bah Vincent H Pala haba pdiang sngewbha ïa u Sangma u la ong, “ngi dap da ka jingkmen ban pdiang sngewbha ïa u John Leslee K. Sangma sha ka ïing ka sem Congress, ka jingwanphai biang jong u ka dei ka khubor ba khlaiñ bha ïa ka jingïatreilang ka BJP-NPP, ha kaba ka politik jong ka jingïapait ïapra bad ka jingbym shimkhia ka la pynlong ïa ka Garo Hills ban duh jingkyrmen. Ka jingshaniah, ka jingshemphang, bad ka jingïadei jong u bad ki paidbah kan long ka atiar ban pynim biang ïa ka saiñpyrthei synshar paidbah ha ka thaiñ. Ka jingkyrshan kaba nang kiew ïa ka Congress ka long kaba ym lah ban pynbakla.”
U Sangma uba dei u nongmihkhmat paidbah uba ju kren bha na ka bynta ki hok bad ki jingangnud jong ki paidbah ha rilum Garo, u la ïasoh shipor bad ka United Democratic Party (UDP).
Ha ka por ba la don ka jingïakren bad ki rangbah, ki nongkyrshan bad ki kynhun bapher bapher u la jied ban leit phai biang sha ka Congress da kaba ithuh ïa ka kum ka rynsan saiñ hima sima kaba tang ma ka kaba dang ïai bteng ban ieng skhem halor ki jinglong jong ka synshar paidbah bad ki hok jong ki jaitbynriew.
Haba ïakren bad ki nongïalam ka MPCC, u Sangma u la pynpaw ïa ka jingsngewkhia kaba jur halor ka jingeh kaba la nang jur ha rilum Garo. U la kdew ba ki samla ki ïakynduh ïa ka lawei kaba dum, na ka jingbym donkam donjam, ka jingduh jingkyrmen bad ki lad ki lynti kiba nang duna kiba pynpaw ïa ka jinglong jingman kaba mynta.
“Nga la ïohi da la ki jong ki khmat kumno ki samla jong ngi ki mad jingeh. Ka jinglong jingman ha rilum Garo ka nang sniew, bad ka Sorkar ka i kumba kam lah ban ai wat tang ka jingkyrmen. Ka don ka kam kaba kyrkieh ban leh ha ki bynta ba napoh,” u la pynpaw.
U la bynrap ba ka Congress ka dang long tang ma ka ka bor kaba lah ban ngeit, kaba ai ïa ka jingmane blei laitluid, bad kaba pynshong nongrim ha ki paidbah kaba lah ban pynphai biang ïa ka jingshaniah, ban ïada ïa ka jinglong jaitbynriew, bad ban kyntiew ïa ka Meghalaya. U la pynskhem biang ïa ka jingangnud jong u ban tei pat ïa ka bor jong ka Party ha South Tura bad ha kylleng ka rilum Garo.
Ka MPCC ka la ong ba ka ngeit ba ka jingwan pynïasoh biang jong u Sangma kan pynkhlaiñ biang ïa ki jingpyrshang ka party ha rilum Garo bad kan pynshlur ïa ki nongïalam bad ki nongshong shnong kiba la duh jingkyrmen ïa kane ka juk kaba mynta ban ïoh biang ïa ka bor saiñ hima sima jong ki hapoh ka lama jong ka Congress.
Ka seng ka pynpaw biang ïa ka jingshimkhia kaba khlem artatien ïa ki jinglong jong ka riti synshar, ki hok jong ki jaitbynriew, ka jingpynkupbor ïa ka ïoh ka kot bad ka jingsynshar kaba khuid bad kaba shai.
“(Ngi) dang ïai bteng ban ieng ryngkat bad ki paidbah ka Meghalaya, khamtam ha ki thaiñ kiba kane ka sorkar ba mynta ka la phiel ban pynurlong ïa ki jingangnud ki paidbah,” la ong ka seng.
