Shillong, Naiwieng, 19: U Myntri ka Sorkar Jylla uba khmih ïa ka tnat Public Health Engineering u Marcuise N Marak u la pynbna ïa ka jingjop ha kaba pyntreikam bad leh test ïa ka Greater Shillong Water Supply Scheme (GSWSS) Phase-III.
Haba kren ha ka jaka ba la pyntreikam ïa ka projek, u Marak u la ong ba kane ka projek kaba la mynjur ha u snem 2008, ha kaba khatduh la lah ban pyntreikam hadien 17 snem.
“Ïa kane ka projek la mynjur ha u snem 2008 bad mynta ka sngi, ha u bnai Naiwieng 2025, ngi la pyntreikam bad leh tes ïa ka,” ong u Marak.
Da kane ka jingpyntreikam, ngin pyndap sa 8 million litar ka um ha ka shisngi ha ka skhim Greater Shillong Water Supply Scheme jong ka nongbah Shillong.
U la bynrap ruh ba ïa ka Stage-I jong ka pumping System ladep ban pyntreikam bad bad leh tes ha kaba kine ruh ki la long kiba jop bad ka jinglehkmen ka dei ka jingsdang jong ka Stage-II, ka ban tan um sha ka jaka pynkhuid um (treatment plant) ha Mawphlang.
U Marak u la ai khublei ruh ïa u Myntri Rangbah ka Jylla u Conrad K Sangma uba la bishar bniah ïa kane ka projek bad kyrshan ïa ka tnad ha baroh ki liang.
“Nga pynpaw ïa ka jingsngewnguh ïa u Chief Secretary barim u Bah D.P Wahlang, uba la trei shitom ïa kane ka projek bad da ka jingkyrshan jong u, ngi la lah ban ïoh ïa ki katto katne ki jaka kiba don jingeh ban pyndep ïa ka projek,” u la ong bad bynrap, “nga sngewnguh shibun eh ban pyntip sha baroh ba mynta ka sngi ngi la lah ban pyntreikam bad ban leh tes ïa ka Greater Shillong Water Supply Scheme (GSWSS) Phase-III. Nga ai khublei ïa ka kynhun jong ki Chief Engineer, Commissioner & Secretary bad baroh ki ophisar kiba don bynta kiba la trei shitom khlem shongthait.
U Marak u la ai khublei ruh ïa ki jingnoh synñiang jong u Chief Engineer barim jong ka PHE bad baroh ki nongshim bynta kiba ka jingpyrshang jong ki ka la pynlah ban pyndep ïa ka projek.
Ïa ka jingtan um kaba 8 million litar shi sngi la khmihlynti ba kan pynjanai ïa ka jingshaniah ha ka jingpynbiang um na ka bynta ki nongshong shnong jong ka nongbah Shillong.
