Shillong, Naiwieng, 24: Ka Khun Hynñiewtrep National Awakening Movement (KHNAM) ha ka Lah Sngi u Blei ka la kynthoh halor ka jingbuh Wallpaper da ka dur jong u Myntri Rangbah ka Jylla u Conrad K.Sangma ha ka Mobile Tablet ba la ai sha ki khynnah skul ba dang pule ïa ka Class-XII.
Ha u kyrwoh ba la phah sha ki lad pathai khubor, u Working President ka KHNAM u Bah Thomas Passah u la ong, mynta ka sngi ka Sorkar Jylla ka la sam ïa ki mobile tablet sha ki khynnah ba pule Class-12 kum shi bynta jong ka “Mission for Youth Empowerment”. Kaba sngewlynngoh ban ïohi ka long ba la buh da ka dur jong u Conrad K Sangma kum ka Wallpaper ha kine ki mobile tablet bad haba kiba bun ki la pyrshang ban weng ruh kim lah shuh.
“Ngi la ïohi ruh ba kane ka Sorkar haba sam ïa ki Guidebook ruh ka la buh da ka dur jong u Conrad K. Sangma ha ka snep jong ka kot. Kine ki jingleh jong ka Sorkar ki paw pynban kum ka rukom ïalap election ym shuh kum kata ka jingthmu ban ïarap ïa ki samla pule ka jylla,” la ong u Working President ka KHNAM.
“Ngi pynrem jur ïa kum kine ki jingleh jong ka Sorkar khamtam eh haba ïa ka pisa la bei na ka pisa u paidbah hynrei balei u Myntri Rangbah u pyrshang ban pynpaw kumba u ai pisa ma u na ka bynta kine ki projek,” la buh jingkylli ka KHNAM bad bynrap, “ngi ïoh ruh ki khubor ba kine ki mobile tablet bun hi ki sniew noh tang hadien katto katne por bad ngim tharai ba kine ki mishon ka Sorkar kin ïarap ïa ki samla hynrei lehse ki ïarap bha pat ïa ki suplaïar lane ki kontraktor kiba ïoh ïa ka Work Order na ka Sorkar ban suplai ïa kine ki mobile tablet.”
