Shillong, Naiwieng, 24: Ka Confederation of Meghalaya Social Organisation (CoMSO) ha ka Lah Sngi U Blei ka la kyntu ïa ka Sorkar Jylla ban pyntreikam da ki kyndon ba pyrkhing ha baroh ki jaka rung bad jaka miih namar ka jingsngewkhia halor ka jingkynnoh ba ki briew ki la phet krad na ka jylla West Bengal bad na ka jylla Assam hadien ba la leh ïa ka Special Intensive Revision (SIR) jong ka Electoral Roll.
Ha ka jingpynlait khubor, u Chairman jong ka CoMSO Bah Roy Kupar Synrem u la ong ba ka seng ka “sngewkhia bha” ïa ka jingrung jingmih beaiñ jong ki riewshimet sha kane ka jylla Meghalaya bad u la maham ruh ba kum kine ki jingwan rung tuh ki briew ki lah ban buh jingma ïa ka jingshngaiñ jong ki paidbah, ka jingshngaiñ hapoh ka jylla bad ïa ka hok jong ki nongshong shnong ka Meghalaya.
U Bah Synrem u la ong ba ka jinglong jingman ka dawa ïa ka “jingshimkhia kaba kyrkieh bad kaba skhem” na ki bor synshar.
“Ka Sorkar ka dei ban bthah ïa ki Deputy Commissioner bad ïa ki Superintendent of Police jong ki District bapher bapher ba kin pynjari da ki kyndon kiba pyrkhing bad ban peitngor ruh ïa ka rung ka mih jong ki briew kiba nabar shapoh ka Jylla,” u la bynrap.
