Shillong, Naiwieng, 24: Ka jingrakhe ïa ka Seng kut Snem kaba 126 snem ka Seng Khasi Kmie, Mawkhar, Shillong ha ka rukom kaba iphuh iphieng bad kaba shongkun la rakhe ha ka sngi u Blei. Kane ka jingrakhe, ka long artad kum ka sngi ba kum ka seng ka la pynhap pyrda ïa ka jingrakhe ïa ka lyngkhuh snem kaba 125 snem kaba la long baroh shi snem.
Ka jingrakhe ïa ka Seng Kut Snem ka la sdang da ka jingkyntiew ïa ka lama da u President ka Seng u Bah O. Pyngrope bad la pynbud sa ka nguh ka dem da ka kynhun u Riew Tymmen Riewsan ka Seng Khasi Kmie hapoh Hall jong ka Seng Khasi Kmie ha Mawkhar.
Hadien kane, ka jingrakhe ka la jam sha ka bynta kaba ar jong ka ïaid pyni riti kaba la sdang na Madan Ïew Rynghep, Laitumkhrah bad hangne ki shnat ka Seng Khasi bad ka Seiñ Raij ki la ïashim bynta lang ban pyni ïa la ki jong ki Tabut jong ki, ryngkat ka kynhun ki nongshad shynrang bad ban ïashim bynta shit rhem da ka jingïaid lang ki paidbah byllien ha la ka jong ka riam ka beit tynrai, ryngkat ka ksing ka dhah, ka bom ka nakra, ka tangmuri bad ka phawar.
Ka ïaid pyni riti kat kumba lah ban ïoh lum jingtip ka jam sha u mawmer jong ka jingdap ba 25 snem pura ka jingsdang jong ka.
Ynda la poi ha Lympung Weiking, Jaïaw, Shillong, ki paid byllien na kylleng sawdong ki shnong ka Bri u Hynñiewtrep Hynñiewkum u Hynñiaw Wasa, ki la pynleit jingmut sha ki nongkren kiba kongsan mynta ka snem, katta u Bah Païa B. Synrem uba long u Asst. General Secretary ka Seng Khasi Kmie bad u Bah Puramon Kynjing uba long u Dolloi jong ka Elaka Jowai bad ha kajuh ka por uba dei u President ka Lympung Seng Khynnah Seng Khasi Seiñ Raij.
Nangta la pyndep sa ïa ka nguh ka dem da u Chairman ka Komiti U Riew Tymmen Riew San ka Seng Khasi Kmie u Bah Skor Jala bad ka kynhun ka jong u bad hadien ka nguh ka dem la sam sa ïa u khaw-eh u khaw-kheiñ.
Ha kane ka sngi ka Seng Khasi Kmie ka la pynkup burom ïa la ki riew rangbah kiba la long teng ruh ki nongïalam ba hakhmat kum ïa u Bah Spiton Kharakor, u (Late) Bah R.T Rymbai, u (Late) Bah H.O Mawrei, u (Late) Bah Hipshon Roy Kharshiing bad u (Late) Bah Lakhon Shullai.
Ki riew pawkhmat kiba la pynshngaiñ ha kane ka sngi ki long u Myntri ka Sorkar Jylla u Bah Waildmiki Shylla, u Syiem ka Hima Khyrim u Pa’iem Dr Balajied Singh Syiem, u Syiem ka Hima Mylliem u Pa’iem Ainam Manik Syiem bad kiwei kiwei .
Ïa kane ka jingrakhe la pynkut da ka rong ka taw, ka rwai ka siaw, ka put ka tem tynrai ba la ïashim bynta da ki jylli bad ki tnat jong ka Seng Khasi bad kumjuh na ka kynhun jong ka Seiñ Raij.
