Shillong, Naiwieng, 25: Ka District Magistrate jong ka East Khasi Hills District ka Kong Rosetta M. Kurbah da ka iktiar ba la pynkupbor hapoh ka Section 163 BNS ha ka sngi Baar ka la pynjari da ka korphiw miet ka ban treikam naduh ka por 8:00 mynmiet haduh ka por 6:00 baje mynstep hapoh shi kilomitar ka jingjngai na khappud ka ri India Bangladesh hapoh u pud u sam ba dang hap hapoh ka East Khasi Hills District.
Ka District Magistrate ha ka hukum ba la pynmih ka la pyntip ba ka jingpynjari ïa kane ka hukum ka long hadien ba ka jinglong jingman ha ka ri Bangladesh, ka lah ban ktah ïa ka shongsuk shongsaiñ jong ki shnong kiba don ha khappud na ka jingrung ruh jong ki runar, ki dkhot jong ki seng kieng atiar ba la shah khein beaiñ, ki nongkhaii ruh bad kiwei kiwei ki kam runar ruser kiba lah ban jia ha khappud ka India bad ka ri Bangladesh.
Katkum kane ka hukum la khang ïa ki briew ban ïaid ha khappud bad ka ri Bangladesh da ka jingthmu ban jam beaiñ ne ban rung tuh sha u pud u sam jong ka ri India, la khang ban ïalum paidbah khlem ïoh jingbit palat 5 ngut shaneng bad ban rah ïa ki tiar pynmynsaw kum ki dieng, ki nar bad ki maw bad ban khaii tuh ïa ki mar bad kiwei kiwei.
Namar ka jingkyrkieh jong ka kam kane ka hukum kan treikam noh mardor na ka bynta ar bnai kynthih tad haduh ban da pynbna da kumwei pat.
