Shillong, Naiwieng, 25: Ka Iingbishar Meghalaya High Court ka la pynkynriah ïa ka sngi ban shong bishar ïa ka mukotduma kaba ïadei bad ka jingthmu ban pynkynriah noh ïa ki 342 tylli ki longiing na Harijan Colony, Them ïew Mawlong.
Da ka jingkyrpad jong ki arliang mamla, ka Single Bench kaba la khlieh da u Justice B. Bhattacharjee ha ka hukum kaba la pynmih ha ka 19 tarik, Naiwieng ka la bthah ba dei ban buh sngi ïa kane kane ka kam hadien lai taiew ban ap ïa ka jingmih jong kawei ka mukotduma kaba ïadei kaba dang sahteng hakhmat ka Division Bench jong ka High Court.
Ha ka 17 tarik, Risaw ka Division Bench ka la ailad ïa ka Sorkar Jylla bad ka Harijan Panchayat Committee ban ïa ka jingpynbeit lyngba ka jingïakren sngewthuh jingmut.
“Ngi kyrmen bad shaniah ba hapoh ka por ba la buh, ki ar liang mamla kin ïaleh shitom ban pynbeit ïa ki jingïakynad da ka jingïakren,” la ong ka Division Bench.
Kum ban shu pyntip, u Symbud Myntri Rangbah uba khmih ïa ka tnat Pynroi Sor u Bah Sniawbhalang Dhar u la pyntip ha ka 10 tarik, Risaw ba ka Sorkar Jylla ka la ithuh khyndiat ki jaka na ka bynta ka jingthmu ban pynkynriah ïa ka jaka sah jong ki Harijan.
