Shillong, Naiwieng, 25: U Myntri ka tnad Aiñ u Bah Lahkmen Rymbui ha ka sngi Baar u la ong ba ka jingtyrwa jong ka Sorkar ban ïoh ïa ka Inner Line Permit (ILP) ka pynpaw ba ka Jylla kam don ïa ki aiñ kiba khanglad ïa ka jingwan rung laitlan bad ka jingwan buhai shnong be-aiñ jong ki briew kiba nabar ha kane ka jylla.
“Lada ki aiñ kiba la don mynta ki biang, ngim donkam hi ruh ban pan ïa ka ILP. Ngi la ïohi ba ki don katto katne ki jingduna (ha ki aiñ kiba la don lypa), dei na kata ka daw ba ngi pan ban pyntreikam ïa ka ILP,” la ong u Bah Rymbui haba kren sha ki lad pathai khubor.
Da kaba shim ïa ka jingïanujor ha ka pyrthei, u Bah Rymbui u la kdew ba wat ka ri United States, kaba ker sawdong da duriaw bah, ka ïakhun bad ka dang sakhi ïa ka jingrung tuh ki mynder ri.
U la ong ba ka Jylla Meghalaya ka pyrshang katba lah ban peit ba yn ym don ki mynder ri kiba wan buhai shnong beaiñ kiba lah ban shong ban sah ha kane ka jylla Meghalaya.
“Dei na kata ka daw ba ngi don bun ki kyndon ban khanglad ïa ka (jingshong shnong be-aiñ). Ngi don ïa ki ADC, ngi don ïa ka Land Transfer Act, ngi don ïa ka Meghalaya Residents Safety and Security Act (MRSSA), ngi don ka Labour Law hynrei tang kawei kaba donkam ka long ka jingïatreilang bad ka jingpeitngor na ki kynhun bapher bapher bad na ki tnat treikam ka Sorkar,” u la bynrap.
Da kaba pynpaw ba baroh ki aiñ kim long kiba janai, u Bah Rymbui u la ong, “Ngi hap ban pyndonkam ïa baroh ki tnat kiba don ha ki jaka ban peit ba ki nongwan buhai shnong be-aiñ kim lah ban shong ban sah ha ka jylla Meghalaya kaba itynnad jong ngi.”
“Haba ngi ïohi ba ka Sorkar India ka sngap jar halor ka ILP, ngi la mynjur ruh ïa ka jingpynbeit thymmai ïa ka MRSSA hynrei kaba sngewsih ka long ba la phah sha ka President bad ngam lah ban kren eiei halor kata,” u la ong.
“Namarkata, nga ong ngi hap ban pyndonkam ïa baroh ki kyndon bad ki jingbthah kiba don, ngi hap ban pyntreikam hok khnang ba ngin lah ban khanglad katba lah ïa ka jingwan rung tuh la ka long na kiwei pat ki bynta jong ka ri ne shabar ri,” la pynkut u Myntri.
