Shillong, Naiwieng, 25: Ïa u samla jong ka samla kynthei ba la 26 snem ka rta, kaba la khladnoh hadien ba la suba ba ka la ryngkoh ne shah bret shabar ka kali ba dang ïaid, la kem noh da ki Pulit bad kham hadien katto katne u la lait jamin noh, la ïathuh u Superintendent of Police ka East Khasi Hills u Bah Vivek Syiem ha ka sngi Baar.
Kane ka la jia ha ka por 11:50 baje shiteng miet ha ka 7 tarik Naiwieng.
“U samla jong ka u leit shaw ïa ka na ka jaka ïathoh shongkurim ha All Saints bad nangne ki la leit sha Police Bazaar bad ynda poi hajan lad ka ophis DC ka la hap napoh kali. Ki la don ruh ki briew kiba la sakhi ba ka la hap shabar ka kali,” la ïathuh u Bah Syiem ha ka jingïakren bad ki lad pathai khubor.
“Ka la khladnoh ha ka 13 tarik, Naiwieng ha Woodland Hospital. Ngi la ïoh ïa ka medical report kaba la batai bniah halor ka jingjia kaba dei na ka daw ka jingmynsaw na u budlum,” u la bynrap.
U SP u la pyntip ba ïa u samla jong ka, uba ñiah ïa ka kali, la kem bad la pyllait jamin noh. U la pyntip ba ïa ka kali ki Pulit ki ladep ban kurup.
“Ïa mynta ka jingtohkit ka dang ïaid shakhmat ban tip bniah la ka dei kaba shu jia ryngkhat lane ka lah ban dei na ka jingñiah stet ïa ka kali lane ka la don lypa ka jingthmu ban shu bret ïa ka shabar ka kali,” la ong u Bah Syiem bad bynrap ba ki Pulit ki dang bishar na ka CCTV bad pyntip ruh ba ki Pulit ki la tohkit ruh ïa u samla jong ka ban tip kham bniah shuh shuh.
Halor kane ka jingjia, u hymmen jong ka lanot u la ujor da ka ejahar ha ka 10 tarik Naiwieng.
