Shillong, Naiwieng, 26: Ka Kynhun Myntri ka la mynjur ban thaw ïa ka Meghalaya Teacher Training Academy kum ka Autonomous Society ban ai jinghikai pyntbit ïa ki nonghikai, ban kyntiew ïa ka bor, bad ban pynjanai shuh shuh ïa ki nonghikai ha ka kam hikai skul.
Haba kren ha ki lad pathai khubor hadien ka jingïalang kaba la long ha ka sngi Balang, u Myntri Rangbah ka Jylla Conrad K Sangma u la ong ba kane ka Society kaba la tyrwa, yn sa pynkha hapoh ka Directorate of Education Research and Training (DERT) bad kan pynleit jingmut na ka bynta ban ai jinghikai kyrpang ïa ki nonghikai ha ki kyrdan bapher bapher.
Katkum ka jingong jong u, ka Autonomous Society kan pynthikna ba ki riewshemphang kin peit ïa ka rukom ai jinghikai, kaba ailad ïa ka jingpynroi ïa ka bor kaba kham treikam bad kaba la buh thong.
Ïa mynta, bun ki tnad Sorkar bad ki kynhun bei pisa ki la pynlong ïa ki prokram ai jinghikai ïa ki nonghikai ha ki jingai jinghikai ki la long kiba jop.
La khmih lynti ba kane ka Academy kaba thymmai kan pynbeit ïa kine ki jingpyrshang, da kaba ai ïa ka jaka ba la pynïasoh lang na ka bynta ka jinghikai kaba bha bad ban pynthikna ba ïa ka pisa yn pyndonkam hok.
“Ki don ki kynhun bei pisa bapher bapher kiba don pisa na ka bynta ka jingai jinghikai ïa ki nonghikai bad baroh ki leh ïa ki jinghikai ha la ka jong ka jong ka bor bad ha la ka jong ka jong ka kyrdan kaba teng teng kam ju poi sha ka thong kaba la khmihlynti. Namarkata kawei ka Society kan pynthikna ba kan buh thong ba baroh ki prokram la ka dei na ka bynta ban bei pisa ïa ka jinghikai pyntbit ïa ki nonghikai, ïa ka pisa yn sa phah beit beit sha ka Society bad ïa ka jingai jinghikai yn sa leh ha ka rukom kaba dei da ka Society,” la ïathuh shuh shuh u Sangma.
