Shillong, Naiwieng 27: Ka Khasi Students’ Union (KSU)-Laban Circle ka la dawa ïa ka Sorkar Jylla ba kan kyndang mardor ïa baroh ki nongbuhai shnong be-aiñ ha Maxwelton Estate bad Mahadev Khola.
Ha ka shithi ba la phah sha u Myntri ka Tnad Revenue & Disaster Management Bah Lahkmen Rymbui ha ka sngi Palei, ka KSU ka la ong, “Ngi kyntu ïa u Myntri ba un pynsted ïa ka kam ban kyndang ïa kine ki nongbuhai shnong beaiñ bad ïada ïa ka jingmyntoi jong ki tari muluk ka thaiñ”.
Ka KSU ka ong ba 9 acre ka jaka ha Maxwelton Estate, kaba hap hapoh u pud u sam ka Dorbar Shnong Kenches Trace Oxford Rilbong (K.O.R), ka dei ka revenue land bad ka dei jong ka Sorkar Meghalaya. Ki don bun ki nongbuhai shnong beaiñ ha ka thaiñ khlem da ïoh jingbit ne jingmynjur jong ka Dorbar Shnong lane kino kino ki bor khmih ba kin leh ïa kane. Ka la kdew ruh ïa ki jingsngewkhia halor ka koit ka khiah, ka khuid ka suba bad ka jingjaboh ka sawdong sawkun.
Haba ong ïa ka jingbym leh eiei ka Sorkar, ka Seng kala kut jingmut ba kan pynbteng ïa ka jingshna ïing ïa ki trai ri trai muluk ha Maxwelton Estate.
“Ka Sorkar la i kumba ka pdiang ïa ki sienjam ba la shim da ka KSU namar ka la ïaid la jan shisnem hynrei kam shym la leh eiei halor kane ka kam. Lada ka Sorkar kam lah ban leh eiei ïa kane ka kam kaba la sahteng la slem, ka seng kan bteng ha kaban tei ïa ki jingtei ban eh shirta ha Maxwelton Estate na ka bynta ki trai ri trai muluk ka thaiñ,” ka la ong.
Haba ïadei bad ka Mahadev Khola, ka KSU ka la kynnoh ba ki nongbuhai shnong beaiñ ki la tei ïa ki jingtei ban eh shirta bad bret ia ki jaboh jabaiñ ha ka wahduid ba marjan bad pynjaboh ïa ka.
Ka KSU ka la leit pynpra ïa katto katne ki jingtei dang shen, hynrei ki bor District kila khot ïakren ha ka jaka ban leh eiei ïa kane ka kam.
“Ka Seng ka la ujor la bunsien bad ki bor ba dei khmih halor kane ka kam hynrei baroh ki poi sha ki skhor ba kyllut bad ki jingtei beaiñ kila nang ïaid, kaba la pynbor ïa ka seng ban leit pynpra ïa kine ki jingtei bad la shah tynjuh bor ha ki briew ka aiñ bad hadien kata, ki bor District kila khot ban ïakren bad ïasyllok halor kane ka kam”.
“Ka bor district ka la aiti ïa ka kaiphod sha phi halor ki jingshem jong ka bad ka Seng ka kwah da ka jingsngewrit ban kyrpad ha ka ban pynsted noh ïa ka kam ban kyndang ïa ki nongbuhai shnong beaiñ ha Mahadev Khola,” la bynrap ka seng.
