Shillong, Naiwieng, 28: Ka Meghalaya bad Greater Shillong Progressive Hawkers and Street Vendors Association ka la ther tyngeh ïa ka Shillong Municipal Board (SMB) halor ka rukom pynïaid ïa ka jingkam bad ka jingpyrshah ïa ki nongdie madan kiba don ha ka thaiñ Civil Hospital.
“Ngi sngewlyngngoh ba la pynbna ïa ka jingbishar khlem da don ka rukom kaba biang ban pyntip sha ki dkhot jong ka PTVC bad ïa ki seng,” la ong ka seng ha u kyrwoh ba la phah sha ki lad pathai khubor ha ka sngi Palei.
“Kane ka dei kaba la shu leh khlem jingkitkhlieh bad kaba ym lah ban pdiang ïa ka rukom treikam jong ka SMB,” la bynrap u kyrwoh.
Ka seng la ka kynnoh ba dei hadien ba ki la aiti ïa ka dorkhas ha ka 24 tarik, Naiwieng, kaba pynpaw ïa ka jingbym shai ha ka rukom treikam, ba la ïasam ïa ka thup kyrteng bad ka jingpynbna ba thymmai lyngba ka WhatsApp ha ka sngi shuwa jong ka jingbishar.
Watla ka seng ka la leit sha katei ka jingbishar, hynrei ka la pynpaw ba kano kano ka jingpynkynriah sha ka jaka ba shipor kan long tang hadien ba la ïasoi ïa ka jingïateh soskular kaba biang bad ki nongdie madan.
“(Ngi) pynkynmaw biang ba kano kano ka jingpynkynriah sha ka jaka ba shipor yn leh tang hadien ba la pyntreikam ïa ka jingïasoi soskular kaba biang bad ki nongdie madan, kaba pyni ba kane ka dei ka jingpynbeit ba shipor, tad haduh ba ynda ladep pynkhreh ïa ka jaka ha phyllaw jong ka civil hospital. Ki nongdie madan kin kynriah lang ha kajuh ka por tad ynda la ïoh ïa ka Certificate of Vending (CoV) ha ka rukom kaba shai ha ryngkat ka jingsakhi lang jong ki dkhot ka PTVC bad ka jingïasoi ïa ka soskular,” la pynpaw ka seng.
Ka seng ka la shim khia ruh halor ka jingpyrshang ban kyndang ïa kiba die jingdie ha ki kali bad ïa ki nongdie madan ba shu wan shipor ha ka thaiñ Khyndai Lad da kaba ong ba ka dei ka jingpynkheiñ ïa ka Street Vendors Act 2014.
“Kam shym la don kano kano ka jingïakren bad ki SOP ha kaba ïadei bad kane ka bynta jong ki nongdie jingdie bad kane ka dei ka jingpynkheiñ ïa ka Street Vendors Act 2014. Ha ka jingshisha ka seng ka kwah ban pynpaw biang ba ki jingïakren bad ki rai ha ka PTVC ha kaba ïadei bad ka jingpynkylla ïa ka jaka hakhmat ka MUDA ban pynshong ïa ki nongdie soh, ki nongdie kwai bad kiwei kiwei ym shym la burom satia da ka jingpynbna ba la pynmihda ka ophis jong u Commissioner and Secretary ka tnat Urban Affairs kaba long kum ka jingpynkheiñ ïa ka aiñ.”
“Ngin ym ailad ïa kum kane ka jinghiar dor ha ka jingsynshar bad ki kam leh beaiñ,” la ong ka seng.
“Ngin sa ïakhun ban pynneh ïa ka aiñ bad ïa ka hok katkum ka riti synshar jong kiba shah iehnoh bein ban kamai jakpoh,” la bynrap shuh ka seng.
