Shillong, Naiwieng, 29: Ka Kashari ka Special Judge POCSO, East Jaiñtia Hills Kong B. Khriam kaba la shem ba u Leiki Rymbai u donkti ban leh ïa ka kam bymman hapoh ka Section 6(1) jong ka POCSO Act ka la rai pynrem da kaba hukum ban set phatok 25 snem bad siew ïa ka kuka kaba T. 1,00,000 lak bad nalor kata, ka Kashari ka la rai pynrem ruh ïa u nongshah kynnoh ban set phatok sa shi snem bad daiñ kuna T. 5,000 hajar.
U kyrwoh ba la phah da u Superintendent of Police ka East Jaiñtia Hills ha ka sngi Thohdieng u la pyntip, ba ki Pulit ka Khliehriat Women Police Station ki la register ïa ka case hapoh ka Section 376(3)/506 IPC pule lang bad ka Sec. 5(n)/6 jong ka POCSO Act. Ïa ka jingtohkit la bynshet ha ka Sub Inspector Kong J. M. Kurbah. Hadien ba la pyndep ïa ka jingtohkit ki Pulit ki la pynngat kyndon ha ka 20.11.2023.
