Shillong, Nohprah, 01: Ka Youth Hostel Association of India (YHAI), Ri Bhoi Unit ha ka sien ba nyngkong eh ka la pynlong ka jingïaid kjat ha ka lah Sngi u Blei kaba la sdnag na ka shnong Moïambei sha ka shnong Kdoh-Hati.
Ha kane ka jingïaid kjat la ïashim bynta palat 25 ngut ki samla kynthei bad shynrang bad ka jingthmu jong kane ka prokram ka long ban ïohi ïa ki jingithiang ka mei mariang kaba long ruh ka spah bah ha ka kam jngohkai pyrthei.
Ka YHAI ka ju pynlong ïa ki jingïaid kjat sha kylleng ki bynta bapher bapher jong ka jylla manla u snem.
Shwa ban ïaid la ïoh ban kaweh lama da u Rangbah shnong barim ka shnong Moïambei u bah Lowis Sohphoh bad ula ai khublei ïa ka YHAI kaba pynlong ïa katei ka prokram bad ki samla ba shim bynta kum kawei na ki lad pynpaw ïa ka thaiñ bad ban ïada ïa ka mariang.
Shwa ban sdang ïa ka jingïaid kjat, la ai jingkren lyngkot da u Chairman ka Adventure Promotion Committee ka ka Youth Hostel Association of India, Meghalaya State-branch u Bah AM Shadap ha kaba u la pyntip ba YHAI ka ju pynlong ïa ki prokram bapher ha kylleng ka jylla man u snem ban lap ïa ki jingdon ba phylla kiba don ha la ki jong ki dur ki rong ban pynitynnad ïa ka marïang kiba u Blei ula kyrkhu kyrpang ha rilum Khasi bad Jaiñtia.
U kyntu ia ki nongïashim bynta ban long kiba jaijai haba ïaid kjat ban lait na ki jingur bad jingmynsaw bad u la mana ruh ba ym dei ban rah ïa ki jingdih pynbuaid ne bret pathar ïa ki plastik, ki bilor um bad kiwei kiwei kiba pynjaboh ïa ka mei mariang.
Ïa ka jingïaid kjat la pynkut ha ka shnong Kdoh-Hati bad la sam ïa ki syrnod sha ki nongshim bynta bad ki jingkren ai mynsiem na u Rangbah Shnong barim ka Kdoh-Hati u Bah W. Lawai.
U Bah Lawai u la pynpaw ka jingsngewkmen ba ki nongsor ruh ki lah ban ïaid kjat kum ki nongkyndong bad ula ong ha ka juk mynta bun ki khynnah kim don por ban ïaid kjat ne ban ïalehkai namarba ki lap miet ban peit tang ïa ki mobile phone.
Ki dkhot ka YHAI ki la ïohsngew da la ki skhor ïa ka khanatang shaphang u Moïambei uba la tip ruh kum u Mawnguid briew ba la ïathuh da u Bah L. Sohphoh bad shaphang ka shnong Kdoh-Hati ba la ïathuh da u Bah W. Lawai ha kaba ki Syiem hyndai ki ju ïaid lyngba da ki Hati bad pynlong kum ka jaka shongthait hapoh shnong ha kaba ki teh ïa u Hati ha u maw bad haduh mynta la khot kyrteng Kdoh-Hati ïa kane ka shnong ha Ri Bhoi District.
Ki dak ki shin ki sakhi na ki jingthoh ha kitei ki maw ki dang don haduh mynta mynne ha ka shnong Kdoh-Hati.
