Shillong, Nohprah, 02: Haduh 24 ngut ki heprit kynthei ki la wan poi biang sha la ka jong ka jylla hadien ba ka Child Welfare Committee, Chikkaballapur, Karnataka, ka la ïoh ban pyllait im ïa ki na Sowmya Kesanupallii Student Home. Penumale, Cliikkabalapur District, Karnataka.
Ïa kine ki heprit kynthei la pdiang sngewbha ha ophis jong ka Directorate of Social Welfare, Shillong ha ka sngi Baar da ka Chairperson jong ka Meghalaya State Commission for Protection of Child Rights (MSCPCR) ka Agatha Sangma bad kiwei kiwei ki ophisar jong ka tnat Social Welfare lem bad ki kmie ki kpa bad ki bahaiing hasem jong kine ki khynnah.
Ka Agatha Sangma ha ka jingïakren bad ki lad pathai khubor ka la ïathuh ba ïa kine ki heprit kynthei kiba don hapdeng ka rta 8-13 snem la shu ïalam be-aiñ sha Karnataka da ka Lei Synshar Cultural Society ha u bnai Jylliew, 2025 ha kaba ki kmie ki kpa ki shu noh synniang pisa tang ka bai leit bai wan bad ha kaba kim donkam satia ban siew ïa ka bai skul bad ka bai sah hostel.
Namarba kane ka jingjia ka dang don hapoh ka Iingbishar Karnataka High Court ïa kine ki khynnah kynthei la pynsah shi por ha Govt. Children’s Home, Chikkaballapur bad hadien ba la wan ïalam biang ïa ki sha Meghalaya yn sa pynsah shwa shipor ha Children’s Home Girls Mawkasiang, Shillong.
Na ka liang jong ka tnat Social Welfare kan sa ïakren bad ka tnat Pule Puthi ban pynrung skul ïa kine ki khynnah na ka bynta ka Academic Session 2026.
Katkum ka jingïathuh jong ka Chairperson, 10 ngut ki heprit kynthei ki dei na East Khasi Hills, 7 ngut na Jaiñtia Hills, 6 ngut na West Jaiñtia Hills bad iwei na West Khasi Hills.
